Ukraina fevral' axırında ilbaşı saylawların häm referendum ütkärüne planlaştıra
Kiev AQŞ aradaşçılığındağı söyläşülär waqıtında Rusiyä belän tınıçlıq kileşüe tözü öçen ilbaşı saylawların häm referendum iğlan itärgä äzerlänä
“Financial Times” gazetınıñ çärşämbe könne Ukrainanıñ häm Awrupanıñ räsmi zatlarına tayanıp bastırğan xäbärenä kürä, Ukraina ilbaşı Volodimir Zelenskiy saylawlar häm referendum planın 24 fevral'dä açıqlawnı planlaştıra.
“Reuters” agentlığı uzğan atnada AQŞ häm Ukraina söyläşüçeläre tarafınnan qaralğan qısalar näticäsendä, tınıçlıq kileşüeneñ referendum aşa Ukraina saylawçılarına täqdim iteläçägen, şul uq waqıtta xalıqnıñ milli saylawlarda da tawış biräçägen belderde. Agentlıq, şulay uq, räsmi zatlarnıñ saylaw häm referendumnıñ may ayında ütkärelü ixtimalın qarawların xäbär itte.
Rusiyä êlegräk Kiev saylawlar ütkärgän oçraqta iminlekne garantiyälärgä häm Ukraina territoriyäseneñ êçke töbäklärenä höcümnär yasamasqa mömkin buluın äytkän ide. Rusiyä ilbaşı Vladimir Putin, şulay uq, Rusiyädä yäşäwçe Ukraina watandaşlarınıñ da tawış birä aluı zarurlığın belderde.
Ukraina ilbaşı Volodimir Zelenskiy şimbä könne yasağan belderüendä AQŞnıñ Mäskäw belän Kiev arasındağı suğışnı “bu cäyneñ başına qadär” tämamlarğa täqdim itüen äytte.
Ğıynvar ayı axırında Aq Yortta jurnalistlar belän söyläşkän AQŞ ilbaşı Donald Tramp, Zelenskiy häm Putin arasındağı şäxsi doşmanlıqnıñ konfliktны tämamlaw tırışlıqların awırlaştıruın äytte. Tramp: "Zelenskiy häm Putin ber-bersen näfrät itä, bu êşne qatlawlandıra. Ämma minemçä, kileşügä bik yaqınaydıq," — dide.
AQŞ ilbaşı Donald Tramp uzğan yıl buyı küp tapqır "axırğı möddät" bilgeläsä dä, alarnıñ hiçbere näticä birmäde. Sonğı atnalarda Rusiyä häm Ukraina wäkilläre arasında AQŞ aradaşlığında ütkän söyläşülär räsmi zatlar tarafınnan konstruktiv häm uñay dip bäyälänsä dä, töp mäs'älälärdä bernindi dä alğa kiteş yuq.
Zelenskiy pänceşämbe könne tınıçlıq söyläşüläreneñ yaqın kiläçäktä däwam itäçägen äytte.