Zelenskiy: "AQŞ Ukrainağa iminlek garantiyäläre birelüen Donbastan çigenüebezgä bäyle qıla"
İran suğışı arqasında AQŞnıñ östenlekläre üzgärgän bulsa da, Kiev, ozın möddätle iminlek garantiyläre öçen könçığıştağı cirlären tapşıru mäs'äläsendä Vaşingtonnıñ basımı astında.
Ukraina ilbaşı Volodimir Zelenskiy “Reuters” agentlığına birgän intervyusında, AQŞnıñ Ukraina öçen iminlek garantiyäläre täqdimen Kievnıñ könçığış Donbasnı Rusiyägä tulısınça birüe belän bäyläwen belderde.
Zelenskiy Vaşingtonnıñ, 2022 yılda başlanğan suğışnıñ tiz arada tämamlanuın teläwe arqasında, Ukrainağa basım yasawın häm Yaqın Könçığıştağı suğışnıñ AQŞnıñ östenlekle yünäleşlärenä täêsir itüen belderde. "Yaqın Könçığış, hiçşiksez, Trampqa täêsir itä... şulay da, ul häman da Ukraina yağına kübräk basım yasaw strategiyäsen saylıy", - dide Zelenskiy.
AQŞ, Rusiyä häm Ukraina bıyıl Abu-Dabi häm Jenevada öç öçyaqlı söyläşü ütkärde.
Zelenskiy ike töp mä'säläneñ xäl itelmäwen bilgeläp ütte: Ukrainanıñ xärbi ixtiyaçların kem finanslayaçaq häm berlektäşlär kiläçäktäge Rusiyä agressiyäsenä niçek cawap biräçäk. Ul bolay dip östäde: "Ukraina Donbastan çığarğa (çigenügä) äzer bulğanda, amerikalılar bu garantiälärne yuğarı däräcädä tämamlarğa äzer".
Rusiyä Donbasnı tulısınça kontroldä totunıñ üzeneñ suğış maqsatlarınıñ üzägendä buluın raslıy. Şulay da, analitiklar bu mä'sälädä alğarışnıñ akrın buluın äytä.
Zelenskiy mondıy çigenü Ukrainanı häm Awrupanı köçsezländäräçäk dip kisätte, "Min Amerika yağınıñ ilebezneñ könçığış öleşe bezneñ iminlek garantiyälärebezneñ ber öleşe ikänen añlawın bik telär idem" dip belderde.
Söyläşülär bilgesez bulıp qala
İran belän suğış arqasında söyläşülärneñ dürtençe turı kiçekterelde.
Zelenskiy, ägär söyläşülär tuqtap qalsa, Rusiyä Vaşington qızıqsınuın yuğaltayaçaq dip sanıy, dip belderde häm AQŞ ilbaşı Donald Tramp häm Rusiyä liderı Vladimir Putin belän töp mä'sälälärne xäl itü öçen sammit ütkärergä çaqırdı.