Qıtayda “Ragasa” öyermäse yaqınlaşuı säbäple mäktäplär häm kibetlär yabıla

Qıtayda “Ragasa” öyermäse yaqınlaşu säbäble, kim digändä, 10 şähärdä mäktäplär häm êş urınnarın yabu kürsätmäse birelgän.

Bu çaralar distälägän million keşegä täêsir itäçäk häm Qıtaynıñ citeşterü üzägendäge meñlägän obyektınıñ êşçänlegenä zıyan kiteräçäk.

“Ragasa”nıñ 24 säğät êçendä Guandun provinsiyäseneñ üzäk häm könbatış yar buylarına kilep citüe kötelä, di cirle ğädättän tış xällär idaräse sişämbe irtäsendäge belderüendä.

“Töp töbäklär kisken çaralar kürergä tiyeş... keşelärneñ tormışın häm milek iminlegen täêmin itep, zıyan külämen mömkin qädär kimetergä kiräk,” diyelä belderüdä.

Guandun, “Ragasa” yaqınlaşqanda, dawıl öçen iñ yuğarı ğädättän tış xäl reaksiya däräcäse iğlan itte. Gonkong hawa torışı xezmäte mäğlümatlarına qarağanda, cilneñ tizlege säğatenä 230 kilometrğa (140 mil) citä.

İlneñ texnologiya üzäge Şençjen 400,000 keşene êvakuatsiyäläw turında qarar qabul itte, şähärneñ ğädättän tış xäl idaräse "köçle cil, yañğır, dulqınnar häm su basular" turında kisätte.

“Aşığıç qotqaru xezmätkärläre häm keşelärneñ könküreşen täêmin itüçelärdän tış, teläsä-niçek uramğa çıqmawıgıznı ütenäbız,” dielä belderüdä.

Şençjennän tış, çaralar Çjuxay, Dunguan häm Foşan kebek zur şähärlärdä dä kertelä.

“Köçle cil häm yañğır şähärebezgä citdi täêsir yasıy, bik möhim saqlanu xäle tudıra,” diyelä Foşan şähäreneñ ğädättän tış xäl ştabı belderüendä.

“Ragasa” xäzerge waqıtta Könyaq Qıtay diñgezendä xäräkät itä, moñarçı Filippinnarnıñ qayber töbäklärenä zıyan kitergän, anda ber keşe häläk bulğan.

Tönyaq su yullarında, Tayvan buğazınıñ könyaq öleşendä, Başi kanalı häm Guandun yar buyı sularında êşläwçe köymälär "iminlekkä iğtibar itärgä" tiyeş, dip xäbär itä Qıtaynıñ däwlät tapşıruları “CCTV”.

Galimnär, ğomumän, keşelär êşçänlege täêsirendä barlıqqa kilgän klimat üzgäreşläre dönyanıñ cılınuı näticäsendä dawıllarnı köçleräk häm yışraq itä dip farazlıy.