Kreml Nobel tınıçlıq premiyäse öçen Trampnı yaqlayaçağın belderde
Nobel premiyäsen küzätep baruçılar comğa könne açıqlanaçaq älege abruylı büläkne AQŞ ilbaşınıñ alu mömkinlege bik keçkenä buluın söyli.
Rusiyä däwlät başlığı urınbasarı Yuriy Uşakov AQŞ ilbaşı Donald Trampnıñ Nobel Tınıçlıq büläge öçen kandidat bula aluı turında söyläde. Bu xaqta TASS däwlät mäğlümat agentlığı citkerä.
Rusiyä Trampnıñ Ukraina suğışın tuqtatu öçen tırışlıqlarına räxmätle buluın qat-qat belderde. Ukraina ilbaşı Volodimir Zelenskiy pänceşämbe könne yasağan belderüendä, ägär Tramp utnı tuqtatuğa ireşsä, Kievnıñ anı Nobel bülägenä täqdim itäçägen äytte.
Norvegiya Nobel Komitetı comğa könne bik däräcäle häm, şul uq waqıtta, kemgä bulaçağın farazlaw awır Nobel Tınıçlıq bülägeneñ iyäsen iğlan itäçäk.
Êkspertlar fikerençä, komitet ğadättä tınıçlıqnıñ ozın möddätlelegenä, xalıqara duslıqnıñ nığuına häm bu maqsatlarnı köçäytüçe oyışmalarnıñ tınıç êşçänlegenä basım yasıy.
İğlan itü aldınnan büläkneñ Trampka birelü mömkinlege turında spekulyatsiyälär buldı, bu öleşçä AQŞ ilbaşınıñ üze tarafınnan da êşlände. Läkin Nobel bülägen küzätüçelär anıñ mömkinlekläreneñ bik az buluın uylıy, çönki ul üzeneñ tışqı säyäsät ölkäsendäge tırışlıqları öçen şäxsi maktawlar alsa da, büläkne alu öçen citärlek tügel.
Oslo Tınıçlıq tikşerenü institutı tarafınnan büläkne aluçı itep täqdim itelgän törkemnär arasında Sudannıñ ğädättän tış xälgä cawap birü bülekçäläre, ildäge watandaşlar suğışında humanitar yardäm kürsätüçe cämäğät' çeltäre; Xalıqara Xoquq mäxkämäse häm Xalıqara Cinayät mäxkämäse häm AQŞnıñ Matbuğat ireklegen yaqlaw komitetı bar.
Uzğan yıl büläk Yaponiyädä atom bombası şartlawlarınnan isän qalğan keşelärneñ “Nihon Hidankyo” isemle xäräkätenä birelde. Alar ğomer buyı atom-töş qoralınıñ qullanılışına qarşı êşçänlek alıp bara.
Tınıçlıq büläge - Norvegiya başqalası Osloda birelä torğan berdänber Nobel büläge. Başqa dürt büläk inde bu atnada Şvetsiyä başqalası Stokgolmda tapşırıldı.