Gonkong yanğını: qotqaru çaralarınıñ öçence könendä ülüçelär sañı 128 keşe buldı

Gonkongta soñğı yıllarda bulğan iñ zur yanğında ülüçelär sanı, cirle matbuğat çaraları citkergänçä, 128gä citte. Räsmi zatlar Tai Po rayonında urnaşqan toraq kompleksında çıqqan yanğınnıñ kontrol astına alınuın belderde.

“South China Morning Post” gazetı xäbärenä kürä, ülüçelär arasında ber yanğın sünderüçe bar. Waqıyğada, şulay uq, 76 keşe cäräxätlänä, şul isäptän, 11e — yanğın sünderüçe. Xäzerge waqıtta 56 keşe xastaxanädä.

Qotqaru êşçänlekläre däwam itä, ämma toraq kompleksınıñ böten bloklarında yanğınnar kontrol astına alınğan.

Êlegräk ber köndälek gazeta waqıyğa näticäsendä 280 keşeneñ yuğaluı turında xäbär itkän ide.

Gonkongnıñ baş idaräçese Djon Li Ka-çiu monnan alda cide binada da yanğınnarnıñ kontrol astına alınuın äytkän ide.

Yanğın çärşämbe könne töşke säğatlärdä başlandı. 1900dän artıq fatir bulğan kompleksta remont bara häm monıñ öçen tıştan quyılğan bambuk qorılmalar arqasında ut bik tiz tarala.

Kompleks yaqınça 4 meñ keşe yäşi torğan sigez biyek qatlı bloktan tora.

Remontnı başqarğan tözeleş şirkätennän ike idaräçe häm ber kiñäşçe injener wayımsızlıq arqasında keşe üterüdä ğayeplänep saq astına alındı.

Wäqalätlelär tözekländerü öçen quyılğan bambuk qorılmalar häm täräzälärne qaplagan plastik materiallarnıñ yanğınnıñ tiz arada taraluına möhim öleş kertüen citkerde.

Gonkong iminlek särqatibe Kris Tang söyläwençä, başlanğıç tikşerenülär yanğınnıñ taralu tizlegeneñ ğadättän tış yuğarı ikänen kürsätä, bu kübräk izolyatsiya materialına bäyle.

"Bez binanıñ divarlarnı qaplawçı materialnı, qorılma tiräsendäge çeltärne häm su ütkärmäs brezentnı tikşerdek. Alarnıñ, iminlek standartlarına turı kilgän materiallarğa qarağanda, utnı bik tiz taratuın açıqladıq," dide ul.

Gonkong 17 yıl êçendä berençe tapqır şähär öçen iñ yuğarı — 5nçe däräcädäge yanğın afäte belän oçraştı.

Wäqalätlelär beldergänçä, kürşedäge ike toraq kompleksi da êvakuatsiyalängän häm yanğın arqasında 900läp keşe 8 waqıtlıça urnaşu punktında qala.

Waqıyğa urınına 140tan artıq yanğın sünderü maşinası häm 800dän artıq aşığıç yärdäm xezmätkäre cibärelde.