Putin Tramp belän telefonnan söyläşte

Kreml’ beldergänçä, Rusiya däwlät başlığı Vladimir Putin häm AQŞ ilbaşı Donal’d Tramp samimi häm konstruktiv telefon söyläşüendä AQŞ-İzrailneñ İranğa qarşı suğışı häm Ukraina konfliktı turında süz alıp bardılar.

Rusiya xäbär agentlıqları Kreml’neñ tışqı säyäsät kiñäşçese Yuriy Uşakovqa sıltama belän citkergän mäğ’lümatqa qarağanda, Putin belän Tramp düşämbe könne dekabr’dän birle berençe tapqır söyläşkän. Ber säğat’ däwam itkän bu söyläşüne Vaşington taläp itkän.

Uşakov:“Telefon êlemtäsendä İran belan däwam itüçe konflikt häm Ukraina mäs’äläsen xäl itü öçen AQŞ wäkilläre belän däwam itkän söyläşülär qaraldı”,-dide.

Uşakov süzlärenä qarağanda, Putin Rusiyä öçen möhim berlektäş bulğan İranğa qarşı AQŞ-İzrail suğışına tiz arada säyäsi häm diplomatik çişeleş tabu kiräklegen äytkän.

Uşakov şulay uq Putinnıñ Ukraina suğışına işarä itep Trampqa Rusiya ğäskärläre zur uñış belän alğa barğan êlemtä sızığındağı xäzerge xäl turında da söyläwen belderde.

Kiñäşçe Putinnıñ Ukraina konfliktında Trampnıñ aradaşçılıq tırışlıqların uñay bäyäläwen äytte.

Soñğı atnalarda Rusiya häm AQŞ rasmiläre, şulay uq Rusiya, AQŞ häm Ukraina räsmiläre arasında berniçä oçraşu uzdı , läkin utnı tuqtatu öçen tırışlıqlarda bernindi alğa kiteş yuq.

Uşakov Vaşingtonnıñ xäzerge xalıqara wäzğıyät’ belän bäyle bik möhim berniçä mäs’älä turında söyläşergä teläwen häm söyläşüneñ citdi häm konstruktiv uzuın äytte.

Tramp belän Putin avgust ayında Alyaskada sammit ütkärgän ide.