AQŞ ştatları arzan ênergiyä häm sänäğät wäğdäläre belän törek investorların cälep itärgä tırışa

AQŞ ştat wäkilläre, arzan häm özleksez ênergiyägä ireşüneñ möhimlegenä basım yasap, törek investorların cälep itärgä tırışa häm ênergetika, ximiya, metall, êlektronika, aviaśiya häm sänäğät citeşterüe belän berrättän tarmaqlar arasında xezmättäşlekne kiñäytüne maqsat itä.

Bu kereşülär AQŞ Federal xökümäte iniśiativası bulğan häm çit il keşeläreneñ turıdan-turı kapital saluın häm iqtisadi üseşne qızıqsındıru, täşviq itü maqsatınnan çığıp proyektlanğan “2026 SelectUSA” tanıtu turı waqıtında başqarıldı. İstanbul, Kocaäli häm Änkarada oyıştırılğan çaralarda törek şirkätläre häm AQŞnıñ törle ştatlarınnan wäkillär cıyıldı.

“Shale Crescent USA” Başlığı Nathan Lord oyışmasınıñ, töbäkneñ ênergetika östenleklärenä işaräläp, industriyä investiśiyälären Ohio, Pensilvanya häm Könbatış Virginianı üz êçenä alğan slaneś gazı (shale gas) mäydanına yünältüen äytte.

“Anadolu” agentlığına äñgämä birüçe Lord ênergiyäneñ awır sänäğät öçen iñ zur çığım komponentlarınnan berse buluın häm töbäkneñ kauçuk, pıyala, avtomobil, qorıç häm nefteximiya tarmaqları öçen ışanıçlı häm arzan ênergiyä belän täêmin itüen belderde.

Lord: “Ägär Ohio, West Virginia häm Pensilvanya ştatları ayırım illär bulsa ide, AQŞnıñ qalğan öleşenän häm Rusiyädän soñ dönyanıñ öçençe zur tabiği gaz citeşterüçese bulır ide. Bu tabiği gaz zapası global külämgä iyä. AQŞnıñ iñ arzan tabiği gazı häm êlektrı “Shale Crescent USA” töbägendä urnaşqan. Bu da ênergiyäne küp qullanuçı citeşterüçe öçen tiñsez tabış häm täêmin itü qurqınıçsızlığın buldıra”, - dip äytte.

Lord süzlärençä, ênergiyä belän täêmin itüneñ totrıqlılığı häm uñay bazar şartları xalıqara investorlarnıñ töbäkkä kilüe öçen köndäşlek östenlegen birä.

Töbäkkä investiśiyä kertkän küp millätle şirkätneñ citäkçese belän ütkärgän söyläşügä tuqtalıp uzuçı Nathan Lord bu citäkçeneñ: “Dönyanıñ här cirendä qorılmalar tözedem häm bolar ênergiyä bulğan urındamı, yuğisä kliyentlar urnaşqan urında bulaçaqmı dip härwaqıt uylap qararğa kilergä mäcbür buldım. Çönki bolar berqayçan da ber urında bulmıy. Bu töbäk – şuşı qararğa kilergä mäcbür bulmağan täwge urın, çönki biredä ikese dä bar”, - dip äytüen citkerde.

Lord: “Biredä kapital salırğa teläwçe törek firmaları öçen dä şuşındıy uq mömkinleklär bar. Törkiyädäge oçraşularıbızdan soñ distälägän şirkätneñ töbägebezgä investiśiyä kertäçägenä ışanabız”, - dip äytte.

“Awrupalılar söyli, ämma töreklär êşli”

“Shale Crescent USA”nıñ marketing direktorı Greg Kozera Ohio, Könbatış Virginia häm Pensilvanyada slaneś gazı tabıluınıñ çit il investiśiyäläre öçen cälep itüçänlegen sizelerlek däräcädä arttıruın äytte.

Kozera küp häm arzan ênergiyäneñ bigräk tä qorıç häm nefteximiya tarmaqlarında, citeşterü sektorlarında yañarışqa, canlanuğa kiterüen belderde.

Kozera monnan tış asqormanıñ rolenä dä iğtibarnı yünältep, Törkiyäneñ zur külämle proyektlarnı tiz itep tögälläw säläten maqtadı.

Greg Kozera: "Törkiyädä bulğan waqıt barışında min biredä asqorma investiśiyäläreneñ niçek tiz tämamlanuın añladım. Bez monı AQŞta êşli almıybız. Törkiyä şirkätlärenä kiñäşem: ägär sez ênergiyäne küp qullanuçı bulsağız, başta ênergiyä çığanağın tabığız. Ênergiyä çığanağına yaqınraq bulğan sayın ozaq waqıtlı tabışlılığığız yuğarıraq bulaçaq”, - dip bilgeläp uzdı.

Êş şartların çağıştırıp qarawçı Kozera Törkiyä belän Awrupağa yasağan soñğı säfärlärendä zur ayırmalar kürüen äytte.

Kozera: "Awrupalılar söyläşä, ämma töreklär êşli. Törkiyädäge investorlarğa xökümät kirtälär quymıy, kiresençä qızqsındıra, täşviq itä. İstanbul-Änkara koridorı buylap yaña sänäğät töbäkläreneñ salınuın kürdem. Awrupada isä qorılmalar yabıla”, - dip belderde.

Amerikalı êşmäkär monnan tış: "Säyäsi yaqtan närsä bulğanın belmim, ämma min biredä şunı kürdem: monda yaxşı äyberlär bula, Awrupa awır xäldä häm bu Törkiyäneñ Awrupada çın liderlıq rolen üz östenä aluı öçen zur forsat”, - dip äytte.