Rubio Ğazzä belän idarä itü planın açıqladı

AQŞ däwlät-särqätibe Marko Rubio Ğazzäneñ xalıqara şura häm Fälästinle texnokratlar tarafınnan citäklänäçägen äytte.

“Xamas”nıñ qoralsızlandırıluı mäs’äläsendä isä haman da soraw işarätläre bar.

Rubio beldergänçä Ğazzädä ozaqlamıy yaña citäkçelek organnarı qorılaçaq.

Matbuğat oçraşuında belderü yasağan Marko Rubio Ğazzädä yaña citäkçelek qorılğannan soñ totrıqlılıq köçeneñ urnaştırıluı planına tuqtalıp: “Berençe êtapnı tögälläw mäs’äläsendä aşığırğa kiräk,” – dide.

AQŞnıñ Üzäk komandirlığı bu atnada Doxada urtaq illär belän Xalıqara totrıqlılıq köçen planlaştıru mäs’äläsendä söyläşülär ütkärde.

Ğaskäri cibärergä uylawçı illär alarnıñ konfliktka tartılırğa mömkin buluına borçıla.

Rubio äytüençä, Vaşington citäkçelege potenŝial öleş kertüçelärgä bu strukturanıñ wäqalätläre häm finanslawı turında açıqlıq kertergä tiyeş.

“Yöklämädän alda alarnıñ berniçä sorawına cawap birergä tiyeş bez dip uylıym. Suğış qabat başlansa, yänä yuqqa çığarılaçaq qorılmalarnı tözü öçen kem milliardlağan dollar biräçäk? Kemneñ cawaplı buluın häm ozın möddätle totrıqlılıq turında beläseläre kilä,” – dide ul.