BMO: Sudannıñ qurqınıçsızlıq probleması artqan Kordofan töbägennän 4000nän artıq keşe qaçqan
Kordofannıñ öç töbäge armiyä häm 'RSF' paramilitar törkeme arasındağı qatı bäreleşlärgä şahit buldı. Bu xäl un meñnärçä keşeneñ qaçıp kitüenä kiterde.
Xalıqara migratsiyä oyışması, qurqınıçsızlıq probleması artu arqasında, soñğı öç köndä Sudannıñ kön'yağındağı Kön'yaq häm Tön’yaq Kordofan töbäklärennän 4000nän artıq tınıç xalıqnıñ qaçıp kitüen belderde.
Sişämbe könne yasalğan belderüdä, BMO agentlığı 27–29 dekabr' könnärendä Kön'yaq Kordofannıñ Al-Kuweik cirlegennän 1500-dän başlap 2500gä qadär, şul uq töbäkneñ Kadugli şähärennän 375 häm Dillingtan 495 keşeneñ öylärennän kitüen xäbär itte.
Agentlıq bu keşelärneñ Tön’yaq Kordofan, Kön'yaq Kordofan häm Aq Nil töbäklärendäge törle cirleklärgä küçenüen citkerde.
Oyışma belderüençä, Tön’yaq Kordofanda qurqınıçsızlıq şartlarınıñ naçarayuı säbäple Jebrat Al-Şeyx idaräsendäge Um Taghirat häm Al-Marxa awıllarınnan 1020 keşe öylären taşlap kitärgä mäcbür bulğan. Alar başqala Xartumnıñ könbatışındağı Omdurman şähärenä qaçqan.
Yäkşämbe könü agentlıq, şul uq säbäplär arqasında, ike töbäktän 1290 keşeneñ küçenüe turında iğlan itkän ide.
Tönyaq, Könbatış häm Kön'yaq Kordofan ölkäläre armiyä belän "Operativ yärdäm köçläre" (RSF) paramilitar törkeme arasında atnalar buyı däwam itkän qatı bäreleşlär mäydanı ide, bu xäl un meñnärçä keşeneñ annan qaçuına kiterde.
Sudanda “RSF” könbatıştağı Darfur töbägeneñ biş rayonın tulı kontrol' astında tota; fäqät Tön’yaq Darfurnıñ qayber tönyaq öleşläre äle dä armiyä kontrolendä qala. Armiyä isä başqala Xartumnı da kertep, kön'yaq, tönyaq, könçığış häm märkäzdäge qalğan 13 ölkäneñ zur öleşen üz qulında tota.
Sudan armiyäse häm “RSF” arasında 2023 yılnıñ aprelendä başlanğan bäreleşlär ul waqıttan birle meñnärçä keşeneñ ülemenä häm millionnarça keşeneñ öylärennän quıluına säbäp buldı.