İzrail mäyetlärne bäylängän häm intekterelgän kileş cibärgän

Ğazzädä yuğarı däräcäle ber sälamätlek saqlaw räsmi zatı utnı tuqtatu häm äsirlär belän almaşu kileşüe qısalarında İzrail tapşırğan fälästinle totqınnar mäyetlärendä ğazaplaw êzläreneñ buluın äytte.

Ğazzä sälamätlek saqlaw ministrlığı ğomum mödire, fännär doktorı Mönir äl-Burş pänceşämbe könne belderü yasap: “Ğazzä totqınnarı bezgä küzläre qaplanğan, üzläre dä xayvannar kebek bäylängän häm tännärendä qurqınıç intekterü êzläre bulğan kileş tapşırıldı. Barlıq bolar yäşeren räweştä başqarılğan wäxşilekne isbatlıy.”

Äl-Burş mäyetlärdäge êzlärne yäşerep bulmaslıq cinayät dip atadı häm tübändägeçä däwam itte: “Ğayepsez fälästinlelärneñ mäyetläre wäxşilekne isbatlıy çönki alar bäylängännän soñ üterelgän. Ğayeplänüçelärneñ xökemgä tartıluı öçen aşığıç räweştä xalıqara tikşerü kiräk.”

Fälästinle totqınnar media ofisı tapşırılğan qayber mäyetlärdän organ urlanu ixtimalına da iğtibarnı cälep itte.

“Berençel mäğlümatlar qayber mäyetlärdä organnarnıñ urlanğan bula alaçağın kürsätä. Bu isä - yawlap aluçınıñ isän häm ülgän fäästinlelärgä qarata sistematik cinayät praktikasınıñ dälile,” – dip äytelde.

Ofis citkergänçä tapşırılğan şaqtıy mäyetneñ qullarına naruçnik kiderelgän, küzläre qaplanğan häm tännärendä awır intekterü, yandıru häm İzrail köbäle maşinaları tarafınnan izelü êzläre bar.

Pänceşämbe irtänge sägätlärdä Ğazzä sälamätlek saqlaw ministrlığı Xalıqara Qızıl Xaç komitetı aradaşçılığı belän İzraildän 30 fälästinleneñ gäwdä öleşlären qabul itep aluın häm qayberlärendä ğazaplaw êzläreneñ buluın belderde.

Utnı tuqtatu kileşüe uzğan comğa könne ğamälgä kergännän soñ İzrail tarafınnan kim digändä 120 fälästinleneñ mäyete tapşırıldı.