İzrail iqtisadı Ğazzädäge 2 yıllıq genotsidta 57 milliard dollar yuğalttı
İzrail Üzäk Bankı mäğlümatları Ğazzädäge suğış häm regional’ bäreleşlär näticäsendä il iqtisadınıñ citdi yuğaltularğa duçar buluın kürsätä.
“Bloomberg” citkergän xisapka qarağanda, İzrail' iqtisadı Ğazzädä ike yıl däwam itkän genotsid waqıtında 57 milliard dollardan artıq zıyan kürde.
İzrail Bankınıñ 2025nçe yılğı xisabında bastırılğan mäğlümatlarğa kürä, 2023- 2025 yıllar arasında zıyan 177 milliard şäkel, bu 57 milliard dollarğa yäki yıllıq êçke tulayım produktnıñ 8,6%ına turı kilä.
Bu zıyannıñ kübese Ğazzädäge genotsadqa bäyle dip äytelä, şulay uq, İzrailneñ Livanğa basıp kerüe belän bäyle çığımnar da urın alğan.
Xisapta İranga qarşı dürtençe atna däwam itüçe suğışnıñ iqtisadi täêsire kertelmägän.
Bu ay başında İzrail suğış kabinetı 2026 yılnıñ däwlät byudjetın üzgärtep, suğışnı finanslaw öçen 13 milliard dollar östäde.
Xisap, şulay uq, säwdä modellärendäge üzgäreşlärne dä assızıqlıy. Aña qarağanda, İzrailgä tänqıydi qarawçı sigez Awrupa Berlege ilenä yasalğan êksport 2024 yılda - 1 milliard dollar, 2025 yılda isä 1,5 milliard dollarğa kimegän, moña qarşılıq qayber başqa illär belän säwdä artqan.
İzrail Bankı: "Bu model säyäsi pozitsiyälärneñ bu illärgä yasalğan êksport külämnärenä yoğıntı yasawın kürsätergä mömkin,"— dide.
Bank, şulay uq, ütkän iyun’ ayında İran belän bulğan 12 könlek suğışnıñ gına da iqtisadi näticäne tulayım êçke produktnıñ 0,3%ı külämendä kimetüen östäde.
İzrail 2023 yılnıñ oktyabrendä Ğazzägä qarşı suğış başladı, anda 72 000nän artıq fälästinlene üterde, yaqınça 172 000 keşene yaraladı häm tınıç asqormanıñ yaqınça 90%ın yuqqa çıqardı.