“İkençe bötendön’ya suğışınnan soñ xalıqara sistema legitimlıq krizisı kiçerä”

Törkiyä ilbaşı Räcäp Täyyip Ärdoğan comğa könne İkençe  bötendön’ya suğışınnan soñ ciñüçelär tarafınnan tözelgän xalıqara sistemanıñ här ölkädä diyärlek zur legitimlıq krizisı kiçerüen belderde.

İlbaşı Räcäp Täyyip Ärdoğan İstanbulda Törkiyä ilbaşı idaräseneñ êlemtä bülege tarafınnan oyıştırılğan 2026 nçı yılğı Xalıqara strategik kommunikaśiya sammitına (Stratcom Summit ‘26) cibärgän videoyullamasında bolay dide:

“İkençe bötendön’ya suğışınnan soñ ciñüçelär tarafınnan  tözelgän xalıqara sistema här ölkädä diyärlek zur legitimlıq krizisı kiçerä. Sistemanıñ nigezen täşkil itkän oyışmalar, qağıydälär häm qıymmätlär könnän-kön üz funkśiyälären yuğalta bara”.

Ärdoğan üz yullamasında bolay dip belderde: “Bez ênergetika, texnologiya häm säwdä kebek törle ölkälärd köç köndäşlege taralğan; problemalar dialog urınına qorallar belän xäl itelergä tırışılğan; genośidlar, suğışlar häm krizislar köçäyä barğan awır çor kiçeräbez.

Gazzädäge kebek yöräklärebezne ärnetüçe faciğalärne tuqtatu häm böten dön’yada, bigräk tä töbägebezdä tınıçlıq häm totrıqlılıq urnaştıru härwaqıttağıdan tağın da möhim”.

İlbaşı xaqıyqat’ne bozıp kürsätü öçen qorılğan yaña häm yalğan xikäyälär tudırunı buldırmas öçen kommunikaśiya häm xezmättäşlek mexanizmnarın nığıtu kiräklegen assızıqlap, däwlät häm xökümätlär belän bergä galimnärne, ictimağıy häm töşençä oyışmaların, xalıqara aktyerlarnı kübräk iniśiativa kürsätergä häm aktivraq bulırğa çaqırdı.

“Törkiyä bularaq bez gumanitar qıymmätlärgä häm ğadellekkä nigezlängän prinśipial’, nıqlı häm tınıçlıqqa yünältelgän totışıbıznı däwam itäçäkbez; bez töbägebezdä genä tügel, ä böten dön’yada tınıçlıq häm iminlekne yañadan torğızu öçen bar mömkinleklärebezne qullanaçaqbız”,- dide Törkiyä ilbaşı üzeneñ videoyullamasında.