BMO maxsus xisapçısı Françeska Albaneze AQŞta mäxkämäneñ üzenä qarşı sanktsiyälärne tuqtatıp toru qararın “süz irege häm xalıqara yaqlaw öçen ciñü” dip atadı.

Albaneze “X” çeltärendä bu qarar turında xäbär itte häm tübändäge süzlärne yazdı: "AQŞ mäxkämäse miña qarşı quyılğan sanktsiyälärne tuqtattı! Mäxkämä räiseneñ äytüençä: 'Süz iregen saqlaw härwaqıt cämğıyät mänfäğatendä’"

Albaneze İzrailneñ Ğazzädäge agressiyäsenä qarşı açıq tänqıytläre belän härdaim xalıqara cämäqatçelekneñ iğtibarın cälep itä.

AQŞ uzğan yıl Amerika häm İzrailneñ räsmi zatlarına qarşı Xalıqara cinayät mäxkämäsen (XCM) xäräkätkä kiterergä tırışuı säbäple Albanezeğa qarşı törle sanktsiyälär kertkän ide.

AQŞ däwlät särqatibe Marko Rubio ul waqıtta Albanezenıñ räsmi zatlarğa, şirkätlärgä häm citäkçelärgä qarşı çaralar kürelüenä "qanunsız häm xurlıqlı tırışlıq" quyuı öçen sanktsiyälär kertelüen beldergän ide.

Rubio Albanezenı här ike ilgä qarşı "säyäsi häm iqtisadi suğış alıp baru"da ğayepläde häm bu êşçänlekkä monnan soñ tüzep torılmayaçağın äytte.

Sanktsiyälär Albanezenıñ İzrail tarafınnan Fälästin cirlären basıp alunı ciñelläşterä dip belderelgän şirkätlärne kürsätkän xisabınnan soñ quyılğan ide.

Bu şirkätlär arasında xärbi cihazlar, küzätü texnologiyäse häm asqorma belän täêmin itüçe “Microsoft”, “Alphabet”, “Amazon” häm “Palantir” da bar ide.