“Rusiyä-Ukraina kileşüe Awrupa faydasına”

Bryusselda oyıştırılğan NATO tışqı êşlär ministrları cıyılışında qatnaşqan Törkiyäneñ tışqı êşlär ministrı Rusiyä häm Ukraina arasında çınğa aşa alaçaq tınıçlıq söyläşüläre öçen Törkiyäneñ yaraqlı urın buluın äytte.

Ministr Fidan “TRT Haber” kanalına çärşämbe könne birgän intervyuda bolay dide: “Monı uzğan cäy İstanbulda 3 tapqır ütkän cıyılışlar belän isbatladıq; oçraşular oyıştırdıq, utırışlar belän citäklädek. Taraflar här cıyılıştan qanäğat qaldı.”

Awrupa Berlege häm NATO äñgämädäşläre belän küreşep söyläşkän törek ministrı beldergänçä fiker alışular küpçelek Rusiyä-Ukraina suğışı, tınıçlıq urnaştıru mömkinlekläre häm Törkiyä töp rol uynağan kiñräk regional mäs’älälärgä yünältelde.

Xaqan Fidan Rusiyä-Ukraina arasında tınıçlıq urnaştıru barışına optimistik qaraşta buluın citkerep: “İñ möhime – söyläşü östäle artınnan torıp kitmäw. Kompromiss niyäte belän utırsağız, näticägä kiläçäksez,” – dide.

Ministr şulay uq Amerikalı aradaşçı Stiv Uitkoffta söyläşülärneñ alğa kitüenä öleş kertä alaçaq sälät buluın açıqladı.

İke ilneñ ozaqlamıy tağın da uñay totış kürsätä alaçağına ışanuın da äytte.

Fidan kileşüneñ suğışnı tuqtatıp qına qalmıyça Awrupanıñ kiläçägenä dä şäkel biräçägen assızıqlap: “Härkem risk häm tabışın isäpli. Mondıy butalçıq şartlarda maqsatlarnı bilgeläw häm taraflarnı bu maqsatlarğa yünältü könnän-kön tağın da möhim,” – dide.

Ministr Fidan Törkiyäneñ Qara diñgez yarlarına yaqın urında säwdä köymälärenä oyıştırılğan soñğı höcümnärgä dä tuqtaldı.

“Suğış geografiyase kiñäyä, bu bik qurqınıç,” – dide ul.

Törek ministrı Awrupa Berlege belän mönäsäbätläre mäs’äläsendä Törkiyäneñ barlıq Awrupa berlege illäre belän diyärlek mönäsäbätläreneñ uñay buluın äytte häm Könyaq Kipr grek citäkçelege totışınıñ xezmättäşlekkä kirtä bulırğa däwam itüen assızıqladı.