Zelenskiy Tramp belän söyläşkännän soñ Awrupa liderları belän kiñäşläşäçäk

Ukraina däwlät başlığı Volodimir Zelenskiy AQŞ ilbaşı Donald Tramp belän oçraşuınnan soñ Awrupa liderları belän küreşäçägen äytte.

Zelenskiy yäkşämbe könne diplomatik yulda östenleklärne koordinaśiyäläw öçen Ukrainanıñ qayber berlektäşläre belän söyläşüen belderde.

“Telegram”dağı yazmasında ul: "İrtägä ilbaşı Tramp belän uzaçaq oçraşudan soñ kiñäşmälärne däwam itäçäkbez", — dide.

Zelenskiy berlektäşläre belän söyläşte häm Tramp belän oçraşır aldınnan, Rusiyäneñ başqalağa soñğı höcüme waqıtında Kievnı keşesez hawa apparatları häm raketalar belän bärüennän soñ, yañadan teläktäşlek süzläre aldı.

Ukraina däwlät başlığı, Floridağa Tramp belän oçraşırğa barışlıy Kanadada tuqtalış yasap, Kanada prem'yer-ministrı Mark Karni belän söyläşte.

Awrupa Berlege liderı Ursula fon der Leyen sośial' çeltärdäge yazmasında Ukrainanıñ möstäqıyllegen häm cir bötenlegen saqlawçı "ğadel häm däwamlı tınıçlıqnı" xuplawların äytte.

Rusiyä Ukrainanı häm Awrupalı yaqlawçıların AQŞ aradaşçılığında äzerlängän häm suğışnı tuqtatuğa yünältelgän plannı "batırırğa" tırışuda ğäyepläde.

Suğış qırındağı basımnı arttırıp, Rusiyä Ukrainada tağın ike şähärne — Mirnograd häm Gulaypolenı üz kontrole astına aluın iğlan itte.

"Kiyevtağı räsmi zatlar bu êşne tınıç yullar belän çişärgä telämäsä, barlıq mäs'älälärne xärbi yullar belän çişäçäkbez", — dide Rusiyä ilbaşı Vladimir Putin.