Fälästin totqınnarı êşläre komssiyasenä kürä yaw astındağı Yordannıñ könbatış üzänlegeneñ Ramallah yanındağı Ofer xärbi törmäsenä bäyle Gilad kampusında totıluçı totqınnarnıñ fäläkät dip sürätlänüçe şartlarda yäşi.

Komissiya yäkşämbe könne töbäkkä barğan ber advokatnıñ 100dän alıp 120gä qadär totqınnıñ 12 bülmägä kertelüen häm qırıs, keşeleksez şartlarda yäşäwen äytüen belderde.

Komissiya: “Törmä citäkçelege totqınnarnı şulay uq keçkenä bülmädä tota, qıynıy häm xätta êlektr şokı kebek cäzalar birä,” – dide.

Advokat kampusta qayber totqınnarnıñ naruçnikta buluın, küzläreneñ qaplanuın, başların asqa qaratıp alıp baruların citkerep, alarnıñ kiyem häm gigiyena äyberläre mäs’äläsendä qıyınlıq kürüen açıqladı.

“Külmäk häm êçke kiyemnären atna ber tapqır ğına almaştıralar, çalbarlar isä yırtılğaç qına yañartıla. Küp keşe ber çalbarnı aylar buyı kiyä,” – dide ul.

Advokat süzlärenä qarağanda totqınnar salqın su belän yuına, şampun urınına sawıt-saba yua torğan gelne qullana. Yuınu öçen isä iñ kübe 20 minut birelä.

Totqınnar töşke aşta ikmäk häm yoğurt aşıy, atna ber tapqır tuna balığı häm sosiska birelä.

Qayberläre bülmädä urın bulmağanlıqtan idändä yoqlarğa mäcbür.

Qış aylarında şartlar tağın da qırıslaşa. Yurğannar citmi, timer täräzälär yabılmıy.

İzrail citäkçelege advokatnıñ süzläre belan bäyle belderü yasamadı.

Xäzerge waqıtta İzrial törmälärendä xatın-qızlar häm balalarnı da kertep 10 meñnän artıq fälästinle bar. Alarnı cäberlilär, aç totalar häm mediśina yärdämen kürsätmilär. Şunıñ arqada xäzergä qadär kübese yaqtı dönyadan kitte.