Ärdoğan Rusiyä-Ukraina suğışın beterü öçen İstanbul söyläşülären qabat başlatırğa çaqırdı
Törkiyä Cömhüriyäte İlbaşı Räcäp Tayyip Ärdoğan Änkaranıñ Rusiyä belän "utnı tuqtatunı tizlätäçäk, ğadel häm daimi tınıçlıq yulın açaçaq härtörle täqdimne” söyläşergä äzer buluın belderde
İlbaşı Räcäp Tayyip Ärdoğan Ukrainalı wazıyfadaşı Volodimir Zelenskiy belän oyıştırğan matbuğat oçraşuında Ukraina suğışı belän bäyle bularaq: “Xäzerge waqıtta kiskenläşkän problemalarnı xäl itü öçen İstanbul barışın tağın da tulıraq êçtälek belän ğämälgä aşıru faydalı bulır”, - dip sanawın äytte.
Ärdoğan çärşämbe könne: “Här ike yaq öçen dä suğışnıñ cimergeç yoğıntıları arta barğan çorda İstanbul söyläşüläreneñ diplomatik çişeleşkä qağılışlı tırışularda möhim êtap täşkil itüenä ışanuıbıznı belderdek”, - dip äytep, Törkiyäneñ aradaşçılıq role belän oyıştırılğan söyläşülärneñ suğışnı beterüdäge ähämiyätenä basım yasadı.
Ärdoğan Änkaranıñ utnı tuqtatunı tizlätäçäk häm ğadel, daimi tınıçlıqqa nigez bulıp toraçaq härtörle täqdimne Rusiyä belän söyläşergä äzer buluın äytte.
Törkiyä Rusiyä belän Ukraina arasındağı qan qoyunı tuqtatırğa teläwçe böten taraflarnıñ İstanbul barışına konstruktiv öleşen kertüen kötüen citkerde.
Törkiyäneñ diplomatik tırışuları
Zelenskiy isä Ukrainanıñ yıl axırına qädär Rusiyä belän suğış äsirläreneñ almaşu barışın yañadan başlatunı ömet itüen äytte.
Ukrainanıñ suğışnı beterü öçen Törkiyäneñ diplomatik tırışularına ışanuın iskärtep uzuçı Ukraina liderı: “Älbättä, diplomatiya mäs’äläsendä anıq itep söyläştek. Xäzer bik küp barış tağın da aktivlaştı häm böten êşçänlekneñ dä tınıçlıqqa yünältelgän buluın täêmin itärgä tırışabız”, - dip äytte.