Kreml Awrupağa citdi kisätü yasadı

Kreml Awrupalı liderlarnı Rusiyäneñ aqçasın urlağan keşe yäisä illärne cawapqa tartaçağı mäs’äläsendä kisätte. Rusiyä aqçaların urlawnıñ Awrupa banklarına häm investiŝiyalärenä naçar täêsir itäçägenä iğtibarnı cälep itte.

Kreml süzçese Dmitriy Peskov çärşämbe könne jurnalistlarğa belderü yasap bolay dide: “Süz Rusiyä aktivınıñ qanunsız räweştä qulğa töşerelüe turında bara. Rusçada monı ğadi tel belän qaraqlıq dip atıybız.”

Peskov äytüençä beräwlär Rusiyä aktivların yäisä alardan kilgän keremne urlasa yäisä üzläştersä, bu êşkä qatnaşı bulğan keşelär cawapqa tartılaçaq, alarnıñ barısı da xisap biräçäk.

Peskov şulay uq bu êştä qatnaşı bulğan illärneñ dä cawapqa tartılaçağın belderde:  “Bu – milek qağılğısızlığı prinŝibına bulğan ışanıçnı beterüçe adımnar.”

Kreml Rusiyä mileklären tartıp alu tırışlıqlarınıñ üzäk bank sistemasına, yevroğa bulğan ışanıçqa häm Awrupada milek häm milek xoquqları iminlege belän bäyle qaraşqa ışanıçnı kimetäçägen citkerde.

Kileşü tözü tırışlıqları

Awrupa berlege Awrupada tuñdırılğan Rusiyä aktivların qullanıp Ukrainağa 140 milliard yevrolık kredit birü täqdimen qarıy.

Tuñdırılğan Rusiyä aktivlarınıñ tuplamı – yaqınça 300 milliard dollar. Monıñ yaqınça 210 milliard yevrosı Awrupada totıla häm 185 milliard yevrosı Brusseldağı “Euroclear”da tora.

Awrupa Berlegeneñ yuğarı däräcäle diplomatı Kaya Kallas çärşämbe könne belderü yasap, Rusiyä aktivlarınıñ Ukrainağa kompensaŝiya kreditı öçen qullanıluın barlıq äğza illärneñ xuplamawına qaramastan berlekneñ kileşü tözü öçen mömkin räweştä tiz êşlärgä tırışuın äytte.