“Ğazzädäge Xalıqara totrıqlılıq köçenä qağılışlı söyläşülär däwam itä”

Törkiyä Cömhüriyäte tışqı êşlär ministrı Xaqan Fidan şimbä könne yasağan belderüdä Ğazzädäge Xalıqara totrıqlılıq köçenä qağılışlı bäyäläwlärneñ däwam itüen, söyläşülärneñ bu köçneñ wäqalätlärenä häm angajement qağıydälärenä yünälüen belderde.  

Fidan köç buldıru mäs’äläsendä zur soraw bilgese buluın assızıqlap, bu köçtä qaysı illär qatnaşaçaq, köçneñ strukturası , berençe wazıyfasınıñ nindi bulaçağı kebek mäs’älälärneñ äle dä bilgesez buluın äytte.

Xaqan Fidan bolay dide:
“Meñlägän neçkäleklär häm sorawlar bar. Bez Xalıqara totrıqlılıq köçen urnaştırğaç prośess äkrenläp formalaşaçaq dip uylıym”.

Tışqı êşlär ministrı köçneñ berençe maqsatı fälästinlelär belän izraillelärne çik buyında ber-bersennän ayırunı täêmin itü häm nizağ qurqınıçın kimetü bulırğa tiyeş dip belderde.  

Törkiyä ut­nı tuqtatu kileşüeneñ garantlarınnan berse, läkin Tel’-Avivnıñ Änkara belän mönäsäbätläre Ğazzädäge suğış arqasında kiyerenke bulğanlıqtan, İzrail xökümäte Törkiyä qurqınıçsızlıq köçläreneñ Xalıqara totrıqlılıq köçenä quşıluına qarşı çığa.

Fidan:
“Ukrainada, Ğazzädä häm Süriyädä êşlärneñ cayğa salınuı öçen tırışlıqlar bara. AQŞ ilbaşı Donal'd Tramp tarafınnan xuplanğan aradaşçılıq tırışlıqları küpçelek oçraqta Törkiyäneñ maqsat häm mänfäğat’läre belän turı kilä”,- dip östäde.

Qatarda uzuçı Doxa forumında çığış yasağan Xaqan Fidan  Törkiyäneñ Süriyä qaçaqların qabul itüdäge rolen assızıqladı, Süriyädä totrıqlılıq urnaştıru öçen xalıqara tırışlıqlarnı koordinaśiyälargä çaqırdı.   

Süriyä watandaşlar suğışınnan soñ açıq işeklär säyäsäten ğamälgä aşıruların beldergän Fidan bolay dide:

“Süriyädäge krizis başlağanda bez şundıy säyäsät alıp bara başladıq. Näticädä küp sanda süriyäle qaçaq suğıştan qaçıp bezgä kilde. Axır çiktä bu säyäsät gumanitar maqsatlarğa xezmät itte”.