"Sumud" flotı yuğarı risklı töbäkkä kergän
50dän artıq köymädän toruçı flot maqsatında İzrail qamalışın beterü bar
“Sumud” flotı beldergänçä köymälär xäzerge waqıtta qamalış astındağı töbäkkä 225 çaqrım yıraqlıqta.
Flot çärşämbe irtän Telegram-kanalda bolay dip yazdı: “Bilgesez köymälär flot köymälärenä yaqınlaştı, qayberläre utların sünderde. Bezneñ yul Ğazzägä taba däwam itä, monnan aldağı flotlar tuqtatılğan yäisä höcümgä duçar qalğan urınğa yaqın bez.”
Flotnıñ Mägribtän bulğan törkem süzçese Wael Naouar Facebookta bolay dip belderde: “Bezneñ köymälär östendä oçuçı dronnar sanı ike tapqır arttı, internetta radio tıyuları köçäyde. Bez qatışuğa äzer, bu kiç, yäisä irtägä.”
Bilgele bulmağan küzläw dronnarı da Urta diñgez sularında Sumud Flotillası yulında urta biyeklektä oça, dip xäbär itte flottağı “Al Jazeera” xäbärçese.
“Adajio” köymäsennän törek aktivistı Möxämmäd Salix beldergänçä İzrail flotına bäyle ber köymäneñ “Sumud” flotına 80 çaqrım yıraqlıqta buluı terkälde.
“Yuğarı risk zonası”
“Bez xäzer yuğarı risk zonasına kerdek, bu urında monnan aldağı flotlar höcümgä duçar bulğan,” - dip yazdı “Sumud” flotı Telegram-kanalda çärşämbe könne.
“Bez İzrail qatışuın yäisä höcümen kötäbez, bügen kiç yäisä irtägä. Zur ixtimal belän bu kiç bulaçaq. Bezneñ barça qatnaşuçılar iminlek jiletların kiep, palubada äzer tora,” - dip belderde Salix Instagramdağı video yullamasında.
Flot organizatorları: “Bezneñ iminlegebez dönyanıñ küzätüenä bäyle. Flotka höcüm – Fälästingä höcüm dimäk,” - kisätüen yasap, urtaq xäräkätkä quşılırğa häm Ğazzädä däwam itüçe genoŝidka qarşı torırğa çaqırdı.
Qamalışnı beterü
Sişämbe könne “KAN” flotnıñ İzrailneñ qatışu zonasına kerüen, häm İzrail diñgez köçläreneñ köymälärne qulğa töşerergä äzerlänüen xäbär itte.
İzraille räsmi zatlar flottağı aktivistlarnı zur xärbi köymägä küçerergä häm köymälärne Aşdod portına kiterergä planlaştıra.
Flot gumanitar yärdäm häm xalıqara aktivistlar belän tulı, İzrailneñ yıllar buyı däwam itkän qamalışın beterü omtılışınıñ ber öleşe bulıp tora.
Flot avgust axırında häm sentäbr başında yulğa çıqtı.
Ğazzädä yaqınça 2 million 400 meñ fälästinle yäşi häm 18 yıl tiräse İzrail qamalışı astında.