BMO: AQŞ belän İzrailneñ İranğa qarşı suğışı tağın 45 million keşene açlıqqa êtärä
BMO Bötendönya azıq-tölek programmasınıñ belderüenä kürä, suğış arqasında bäyä artuları global’ açlıq däräcälären rekordlı kürsätkeçlärgä kütärergä mömkin, bu isä gumanitar yärdämne finanslawnı qıyınlaştırırğa mömkin.
Berläşkän Millätlär Oyışması Yaqın Könçığış konfliktı iyün ayına qadär däwam itsä, tağın 45 million keşeneñ kisken açlıq belän oçraşırğa mömkin buluın, monıñ isä global’ kürsätkeçne "qurqınıç" däräcägä kütärüen äytep kisätte.
Öçençe atnasında barğan suğış yözlägän keşeneñ gomeren özde. İrannıñ İzrailgä häm Farsı qultığı illärenä cawap höcümnäre başlawı, häm Livanda İzrail belän “Xizbulla” arasında yaña front açıluı belän ul tağın da köçäyde.
"Ägär Yaqın Könçığış konfliktı iyün ayına qädär däwam itsä, bäyälär artu säbäple tağın 45 million keşe kisken açlıqqa duçar bulırğa mömkin", - dide Berläşkän Millätlär Oyışmasınıñ Bötendönya azıq-tölek programması başqarma direktorı urınbasarı Karl Skau sişämbe könne Jenevada uzğan matbuğat konferensiyäsendä.
"Bu global’ açlıq däräcäsen iñ yuqarı noqtağa kütäräçäk, häm bu bik, bik qurqınıç perspektiva", - dip östäde ul. Xäzerge waqıtta 319 million keşe kisken azıq-tölek qıtlığı belän oçraşa.
"Bu, çınnan da, wäzğıyätne bötenläy yaña däräcägä kütärä."
Skau äytüençä, 28 fevral’dä suğış başlanğançı uq Bötendönya azıq-tölek programması zur awırlıqlar belän oçraşqan.
"Açlıq berqayçan da mondıy köçle bulmağan ide", - dide ul, moña qayber töbäklärdä êkstremal’ hawa torışı vaqıyğaları, konfliktlar häm açlıq iğlan itü säbäp buluın bilgeläp ütte.
"Şul uq waqıtta resurslar 2023 häm 2024 yıllardağı däräcälärdän kisken kimede".
Skau xezmätkärlärne qısqartırğa häm êşçänlekne ğadiläşterergä turı kilüen äytep, "çınlıqta, bez mömkinleklärebez çiklärenä cittek" dip belderde.
Ul Yaqın Könçığıştağı suğış Bötendönya azıq-tölek programması êşçänlegen "küpkä qıymmäträk" itte dip belderde.
Skau agentlıqnıñ täêmin itü çılbırındağı özekleklär belän köräşergä tırışuın, läkin êkspluatatsiyä çığımnarı, bigräk tä, yağulıq bäyäläreneñ artuı häm ozınraq marşrutlar arqasında, kisken artuın äytte.