Ärdoğan İran häm Livanda mäktäplärgä häm xastaxanälärgä höcüm itüçe qanğa susağan çeltärne ğayepläde
Törkiyä ilbaşı grajdanlıq infrastrukturasına höcümnärneñ Ğazzädäge cimereklärne iskä töşerüen belderep, AQŞ häm İzrailneñ İranğa höcümnärennän soñ köçäygän kiyerenkelekkä iğ’tibar yünältte.
Törkiyä ilbaşı Räcäp Tayyip Ärdoğan şimbä könne yasağan belderüendä İran häm Livandağı mäktäplärgä häm xastaxanälärgä höcüm itüçe qanğa susağan çeltärne ğayepläde, monıñ Ğazzädäge cimereklärne iskä töşerüen äytte.
İstanbuldağı iftar programmasında çığış yasağan Ärdoğan töbäktä köç qullanu cäyelgändä grajdanlıq infrastrukturasına höcümneñ däwam itüen citkerde.
Ärdoğan: “Qanğa susağan çeltär, Ğazzädäge kebek ük, İran häm Livandağı mäktäplärgä häm xastaxanaargä höcümnären däwam itä”,-dip äytte.
Räcäp Tayyip Ärdoğan töbäktä kiyerenkelek köçäygän çorda Törkiyäneñ sabırlıq, salqın qanlılıq häm diplomatik çişeleşlärgä çaqırğan illär arasında buluın assızıqladı.
“Törkiyä bu şartlarda krizislärgä çişeleş êzläwdä aqıl, dialog häm diplomatiya yaqlı aldınğı illär arasında urın ala”,- dip belderde ilbaşı Ärdoğan.
Yaqın Könçığıştağı krizis 28 fevral’dä İzrail belän Amerika Quşma Ştatları İranğa qarşı urtaq höcümnär başlağannan soñ tağın da köçäyde.
Bu höcümnärdä 1.200dän artıq keşeneñ hälaq buluı belderelde. Alar arasında İrannıñ êlekkege dini liderı Ali Xämänäi häm 150dän artıq uquçı qız bala da bar. Monnan tış 10 meñnän artıq keşe yaralandı.
Moña cawap itep İran İzrail, Yordaniya, Ğıyraq häm Amerika Quşma Ştatları xärbi köçläre urnaşqan qayber Farsı qultığı illärenä pilotsız oçu apparatları häm raketalar belän höcümnär oyıştırdı. Bäreleşlär başlanğannan birle 8 AQŞ xärbiye hälaq buldı.