Rusiyä Ukrainanıñ ênergetika infrastrukturasına höcüm itte

Rusiyä saqlanu ministrlığı yäkşämbe könne belderü yasap, Rusiyä köçläreneñ Ukraina xärbi-sänäğät kompleksına bäyle ênergetika infrastrukturasına yaña höcümnär oyıştıruın citkerde. Bu xäbär AQŞnıñ Kiev citäkçelegen ozın radiuslı “Tomagavk” raketaları belän täêmin itü mömkinlege turındağı söyläşülärdän soñ kilde.

Rusiyäneñ “RIA” xäbär agentlığına kürä, ministrlık höcümnärneñ Ukrainada xärbi kiräk-yaraqlar citeşterügä öleş kertüçe ênergetika qorılmalarına yünälüen äytkän.

Şul uq waqıtta, “Interfax” xäbär itkänçä soñğı 24 säğät eçendä Rusiyaneñ hawa saqlanu sistemaları 72 Ukraina dronın bärep töşergän.

Kreml AQŞ raketaların tapşıru mömkinlegenä borçıla

Kreml AQŞnıñ Ukrainağa “Tomagavk” raketaların tapşıru mömkinlege mäs’äläsendä borçu toyuın äytep, konfliktnıñ bar yaqlap kiskenleşüe belän dramatik noqtaga citüenä basım yasadı.

Kreml süzçese Dmitriy Peskov däwlät televideniyesenä: "Tomagavk”lar teması bik zur borçu tudıra. Xäzer çınlap ta bik dramatik waqıt, kiyerenkelek bar yaqlap üsä," – dip belderde.

Peskov “Tomagavk” raketası cibärelä qalsa, Rusiyäneñ monı atom-töş yanaw bularaq qabul itäçägen äytep: "Küz aldına kiteregez: ozın arağa atıla torğan raketa cibärelä häm bez anıñ atom-töş başlıq belän buluın beläbez. Rusiyä närsä uylarga tieş? Nindi reakŝiya kürsätergä tiyeş?" – dide.

AQŞ mäğlümatlarına kürä “Tomagavk” raketaları 2500 çaqrımğa oça ala häm bu raketalarnıñ iske versiyalärendä atom-töş başlıqlar bar.

Putin raketalar tapşırılğan oçraqta "yaña êtap" turında kisätte

Rusiyä ilbaşı Vladimir Putin bu ay başında belderü yasap, bu raketalarnıñ AQŞ xärbi qatnaşuınnan başqa qullanıla almawın açıqlap, Ukrainağa tapşırılğan oçraqta monıñ konfliktnıñ kiskenläşüendä yaña êtap bulaçağı xaqında kisätte.

Vaşington citäkçelege älegä raketalar mäs’äläsendä tögäl qararın açıqlamadı. AQŞ ilbaşı Donald Tramp düşämbe könne yasağan belderüendä raketalarnı cibärgänçe Ukrainanıñ alar belän närsä eşlärgä cıyınuın belergä teläwen läkin qararğa kilüen da äytte.