Paqıstan Qabul şähäre häm Äfğanstannıñ çik buyındağı vilayätlärenä höcüm itte

Äfğanstan räsmiläre belderüençä, Paqıstan Qabulğa häm qayber çik buyı töbäklärenä yaña höcümnär oyıştırğan; başqalada dürt keşe hälaq bulğan.

Qabul poliśiäse süzçese Xälil Zadran, Äfğanstan başqalasındağı toraq yortlarnı bombağa totu näticäsendä dürt keşeneñ ülüen häm 15 keşeneñ yaralanuın äytte.

İsemen äytergä telämägän Paqıstanlı iminlek räsmi zatı Paqıstannıñ tön däwamında höcümnär oyıştıruın häm maqsatlarında “Paqıstan Talibanı” terrorçıları buluın rasladı.

İslamabad citäkçelege uzğan ayda kürşese Äfğanstanğa ber törkem hawadan höcümnär yasadı häm operaśiäneñ Paqıstan êçendäge höcümnärneñ artuınnan soñ terrorçılarnıñ êşçänlegen tuqtatuğa qarawın belderde.

Qabulda Taliban citäkçelegendäge xökümät bu höcümnärgä bäyläneşe buluı turındağı ğäyepläwlärne kire qaqtı.

Taliban xökümäte süzçese Zabiulla Möcähid, Paqıstan höcümnäreneñ könyaqtağı Kandahar viläyäten dä bärüen, şulay uq Paqıstan çigendäge könçığış viläyätlär bulğan Paktia häm Paktikanı da maqsat itep aluın citkerde.

Paqıstan isä üz operaśiäläreneñ terrorçı törkemnärgä genä yünältelüen häm tınıç xalıqnı ütermäwen äytä.

Äfğanstan häm Paqıstan köçläre arasında soñğı atnalarda çik buyında bulğan bäreleşlär arqasında ike yaqlı säwdä zıyan kürde häm çik buyında yäşäwçe watandaşlar üz yortlarınnan qaçarğa mäcbür buldı.

Berläşkän Millätlär Oyışmasınıñ Äfğanstan missiyase (UNAMA), 26nçı fevral'dän 5nçe martqa qädär Paqıstan xärbi operaśiälärendä 24e bala bulğan barlığı 56 tınıç xalıqnıñ hälaq buluın açıqladı.

BMOnıñ Qaçaqlar agentlığı (UNHCR) bäreleşlär arqasında yaqınça 115 meñ keşeneñ yortsız qaluın xäbär itte.