İzrail “Xamas” tapşırğan mäyetlärneñ üzeneñ ğaskäriläreneke buluın rasladı
Ğazzädäge sälamätlek saqlaw wäqalätleläre İzrailneñ 45 fälästinleneñ gäwdäsen tapşıruın belderde.
Izrail armiyase düşämbe könne “Xamas” tarafınnan utnı tuqtatu kileşüe nigezendä qaytarılğan öç keşeneñ mäyeteneñ ğaskärilärneke buluın rasladı.
Xärbi belderüdä äytelgänçä, gäwdälär polkovnik Assaf Xamami, kapitan Omär Maksim Netura häm serjant Oz Daniêlnıqı. Alar barısı da 2023 yılnıñ 7 oktyabrendä Ğazzä çigenä yaqın urında üterelgän.
“Xamas” bu öç ğaskärineñ gäwdälären yäkşämbe kiçen Qızıl Xacğa tapşırdı. Bu kileşü 10nçı oktyabrdä AQŞ ilbaşı Donald Trampnıñ 20 maddäle Ğazzä planı qısalarında ğamälgä kerde.
“Xamas” bügenge köngä qadär 20 İzrail totqının isän kileş azat itte häm 28 wafat bulğan totqınnıñ 21eneñ gäwdälären qaytardı, alarnıñ küpçelege izraillelär. Läkin Izrail beldergänçä, qaytarılğan mäyetlärneñ berse yuğalğan totqınnar isemlegenä turı kilmi.
Şul uq waqıtta, Ğazzä sälamätlek saqlaw xezmätkärläre beldergänçä, Izrail 45 fälästinleneñ mäyeten tapşırğan, dip xäbär itte AP.
Izrail utnı tuqtatu kileşüeneñ ikençe öleşenä söyläşülär başlaw şartın barlıq totqın mäyetlären qaytaru belän bäyläde. “Xamas” bu protsessnıñ Ğazzädäge zur cimerelülär arqasında waqıt taläp itüen äytä.
Kileşüneñ berençe öleşe izrail totqınnarın yaqınça 2000 Fälästin totqınına almaşunı küzallıy. Planda, şulay uq, Ğazzäne tözekländerü häm “Xamas”tan başqa yaña idarä mexanizmı buldıru qaralğan.
Izrail 2023 yılnıñ oktyabrennän birle Ğazzägä höcümnärdä 69 meñgä yaqın keşene, küpçelege xatın-qızlar häm balalarnı, üterde, häm 170 neñnän artıq keşene yaraladı.