Änkarada Säyäsät, iqtisad häm ictimağıy tikşerenülär waqıfında Törkiyä-İnedoneziya partnyerlığı forumı uzdı. Forumda ike yaqlı mönäsäbätlär häm regional mäs’älälär qaraldı.
Törkiyä häm İndoneziya arasındağı diplomatik mönäsäbätlärneñ 75 yıllığı uñayınnan oyıştırılğan forum ike utırıştan tordı häm här ildän diplomatlar, uqıtuçı-ğalimnär, byurokratlar qatnaşında çınğa aştı.
Törkiyäneñ säwdä ministrı urınbasarı Mostafa Tuzcu açılışta yasağan çığışında partnyerlık forumınıñ ike il arasındağı üsep kilüçe mönäsäbätlärdä yaña borılış noqtası bulaçağın açıqladı.
Tuzcu global iqtisadtağı tirän üzgäreşlärgä qaramastan ike ilneñ dä G20 äğzase bularaq köçle teläktäşlek kürsätüen häm üseş külämnären saqlap qala aluına basım yasadı.
Mostafa Tuzcu Könyaq-könçığış Aziya xalıqlar berlegeneñ iñ zur iqtisadı bulğan İndoneziyaneñ regional üzäk bulu yulında adım yasawın häm dönyaküläm qıymmät çılbırlarına kerüen belderde.
“Strategik partnyerlar”
İndoneziyaneñ İstanbuldağı başkonsulı Darianto Harsono 2050 yılğa qadär yäşel ênergiya, sanlı üzgäreş häm avtomatizaŝiyaneñ artuçı ähämiyätenä iğtibarnı cälep itep, saqlanu xezmättäşlegeneñ Törkiyä-İndoneziya mönäsäbätlärendä möhim tarmaq bulaçağın assızıqladı.
“İke yaqlı häm tarmaq mönäsäbätläre” isemle töştän soñğı utırışta Törkiyä tışqı êşlär ministrlığınıñ İke yaqlı säyäsi êşlär ğomum mödir wäkile Korkut Güngen “Synergy Policies”nıñ başqarma mödire Dinna Prapto Rahardja häm İndoneziyadäge Saqlanu universitetınnan professor Anak Agung Banyu Pervita belän küreşte.
Güngen çığışında Törkiyä häm İndoneziyane G20 häm İslam xezmättäşlek oyışması kebek küp yaqlı platformalarda xezmättäşlek başqaruçı ike dus strategik partnyer dip atadı.
