Ärdoğan: 7 trillion dollarlıq xäläl tovar bazarı tarmağınıñ kiläçäge ömetle

Törkiyä ilbaşı Räcäp Tayyip Ärdogan dönya külämendä xäläl tarmaqnıñ zurlığınıñ 7 trillion dollarğa citüen häm bik küp keşeneñ xäzer xäläl produktlarga östenlek birüen äytte.

Ul çista, sawlıqlı häm dini qıymmätlärgä turı kilüçe xäläl êşlänmälärneñ dönya külämendä iğtibar cälep itüen, alarnıñ dönyada yaqınça ike milliard keşegä ireşüeneñ tarmaqnıñ kiläçägenä ışanıç birüen söyläde.

Çärşämbe könne Bötendönya xäläl sammitınıñ açılış tantanasına cibärgän yullamasında Ärdogan şunı iskärtte: uzğan yılda sammit 50 ildän 50 meñ zıyarätçe häm 500dän artıq şirkätne qabul itkän, ul bu sannarnıñ bıyıl artacağına ışana.

İlbaşı şunı da östäde: sammit global xäläl bazarında iñ zur çara bulıp tora häm ul tarmaqqa zur täêsir yasayaçaq.

Bötendönya xäläl sammitı belän “Halal Expo” çärşämbe könne İstanbulda ber ük waqıtta açıldı. Çara “Innovatsiya häm kamilläşü aşa xäläl sänäğäten nığıtu” töp teması astında ütkärelä.

11nçe Bötendönya xäläl sammitı 26nçı noyabrdan 29nçı noyabrğa qadär Törkiyä ilbaşı ximayäse astında, Islam xezmättäşlek oyışması, Törkiyä säwdä ministrlığı, Xäläl akkreditatsiyä agentlığı häm başqa berläşmälärneñ xezmättäşlegendä ütä.