Malayziyädäge su basulardan yaqınça 11 meñ keşe zıyan kürgän
Kedax, Kelantan, Penang, Perak, Perlis, Terengganu häm Selangor ştatlarında su basu küzätelgän
Düşämbe irtäsenä Malayziyäneñ 7 ştatında su basudan barlığı 10 922 keşe zıyan kürgän, iñ zur zıyanğa duçar bulğan ştat — Kelantan.
Däwlät xäbär agentlığı “Bernama” beldergänçä, ilneñ tön’yaq-könçığışında urnaşqan Kelantan ştatında bügen irtän 3 022 ğailädän 8 248 keşeneñ zıyan kürüe terkälgän.
Bu san aldanğı tönne xäbär itelgän 7 830 keşedän sizelerlek artışnı kürsätä.
Räsmi zatlar äytüençä, Kelantandagı wäzğıyät’ töbäktä köçle yawım-töşem däwam itü arqasnda haman da kritik bulıp qala.
Başqa ştatlar da su däräcäse artu belän köräşä.
Perlis ştatında zıyan kürüçelär sanı aldağı töndä 35 ğailädän 114 keşe bulsa, bügen 243 ğailädän 811 keşegä qadär artqan.
Penangda da zıyan kürgän keşelärneñ sanı arta bara — 57 ğailädän 242 keşegä citkän. Perakta qorbannar sanınıñ artuı xäbär itelä.
Şul uq waqıtta Kedax häm Terengganuda su basudan zıyan kürüçelärneñ kimi başlawı küzätelä.
Selangor su basudan zıyan kürgän soñğı ştat buldı, ul aşığıç yärdäm kürsätü häm yärdäm êşçänlekläre taläp itkän töbäklär isemlegenä kertelde.