Qıtay watandaşlarına Yaponiyägä säyäxät itmäskä kiñäş itte. Bu adım Yaponiyäneñ yaña prem’yer-ministrınıñ Tayvan’ğa qarata ixtimal höcüm turında yasağan belderüläre tudırğan diplomatık kiyerenkelekne tağın da arttırdı.

Krizis prem’yer-ministr Sanaê Takaitineñ 7 nçe noyabr’däge belderülärennän soñ başlandı.

Bu belderülär Qıtay möstäqıyl’lek däğ’wası beldergän häm Yaponiyäneñ iñ yaqın utrawına yaqınça 100 çaqrım yıraqlıqta urnaşqan üzidaräle Taywan’ğa höcüm Tokionıñ xärbi qatışuına kiterergä mömkin dip bäyälände.  

Pekin comğa könne räsmi ğayepläw belderü öçen Yaponiya ilçesen çaqıruın xäbär itte.
Tokio isä moña cawap itep Qıtay ilçesen urınsız dip bäyälägän häm soñınnan sörtelgän onlayn-post säbäple çaqırdı.

Yaponiya Tayvan’ mäs’äläsendäge totışınıñ üzgärmäwenä basım yasıy.

Comğa könne kiçen Qıtaynıñ Tokiodağı ilçelege Qıtay watandaşların säyäxät plannarın yañadan küzdän kiçerergä çaqırğan onlayn-kisätü urtaqlaştı.

Tulı wäqalätle ilçelekneñ räsmi “WeChat” akkauntında tübändäge yullar urın aldı:  
“Sonğı waqıtta Yaponiya räsmiläre Tayvan’ turında açıqtan-açıq provokaśiyäle belderülär yasadı häm bu xalıqlar arasındağı mönäsäbätlärgä citdi zıyan saldı”.

Belderüdä şulay uq bu wäzğıyät’neñ Yaponiyädäge Qıtay watandaşlarınıñ şäxsi iminlege häm tormışına möhim qurqınıçlar tudıruı da assızıqlandı.

“Tışqı êşlär ministrlığı belän Yaponiyädäge Qıtay ilçelege häm konsullıqlar Qıtay watandaşların yaqın kiläçäktä Yaponiyägä säyäxät itmäw turında citdi räweştä kisätä” diyelde belderüdä.

Pekin 1945 yılğa qadär Yaponiya basıp aluı astında bulğan Tayvan’nı üz cirläreneñ ber öleşe dip sanıy häm utrawnı köç qullanıp basu alu mömkinlegen kire qaqmıy.