Törkiyädä 2200 yıllıq 60 qaber tabıldı
Arxeologlar: “Qaberlärdä taş, tılsım häm böti tapqıq,” – dide
Törkiyäneñ könbatışındağı Ägäy töbägendä urnaşqan borınğı Kolossa şähärendä arxeologlar yaqınça 2200 yıl êlekkegä qarawçı 60 qaber taptı.
Anadolunıñ başqa cirlärendä oxşaş qaber törläre tabılsa da, belgeçlär bu qadär tar urında yänäşä qazılğan küp sanda qaberneñ siräk oçrawın belderä.
Törek arxeologı Barış Yänär “Anadolu agentlığı”na birgän intervyuda bolay dide: “Kolossada Anadoludağı iñ zur qıyağa uyıp yasalğan qaberne taptıq. Östendäge tufraqnı alğannan soñ yaqınça 65 qaber kürdek häm bolardan 60ın qazıdıq. Skelet qaldıqları belän ber rättän möhim arxeologik tabıldıqlar bar.”
Arxeolog borınğı çorda keşelärneñ travertinnarnı qaber öçen saylawların assızıqladı.
Barış Yänär tübändägeçä däwam itte: “Borınğı çor keşeläre töbäkneñ geologik häm topografik üzençäleklären osta qullanğannar. Ul waqıtta igençelek, ayıruça aşlıq citeşterelgännän uñdırışlı igen-basularnı saqlar
Borınğı şähär şulay uq ışanu turizmı cähatennän dä möhim potenśialğa iyä. Arxeolog äytüençä tikşerenüdän bu töbäktä yäşägän keşelärneñ ışanu sistemalarına zur ähämiyät birülären kürep bula.
“Tabıldıqlar Kolossa xalqınıñ sixer, tılsımnar häm bötilärgä ışanuın kürsätä. Qaberlär êçendä yazular häm taşlar taptıq,” – dide ul.
Qaberlärdän çıqqan äsärlärgä qarap êlekke cänaza ritualların añlap bula. Qaberdä şulay uq pıyala şeşälär, maylı lambalar, timer aqçalar häm ayaq kiyemnäre dä tabıldı.
Kolossa Farsı çorınıñ iñ möhim şähärlärennän berse bulıp, Rim häm Vizantiya idaräse çorında xristianlık tarixında da ähämiyätle urın totqan.
Ämma yaqın-tirädä İyerapol häm Laodikeya kebek borınğı şähärlär nigezlänä başlağaç, Kolossa üz ähämiyäten yuğalta başlıy häm 1nçe ğasırda bulğan cirteträwdä zur zıyan kürä.
692 yılda qabat tözelgän şähärdä 787dä bulğan tağın ber cirteträwdän soñ yäşäwçe qalmıy.
Öç yıl barğan öske qatlam tikşerenülärennän soñ qazular Pamukkalä universitetınnan arxeolog Barış Yänär citäkçelegendä, Mädäniyät häm turizm ministrlığınıñ “Kiläçäk öçen miras” proyektı qısalarında başlatıldı.
Bu urın bügenge Dänizli vilayäte çikläre eçendä, Honaz tawı itäklärendä urnaşqan.