BMOnıñ Keşe xoquqları yuğarı komissarı Volker Türk oktyabr’ axırında paramilitar Operativ yärdäm köçläre kontrolenä küçkän Faşirdağı wäxşieklär Sudannıñ Kordofan töbägendä dä qabatlanırğa mömkin dip borçıluların citkerde.
Volker Türk çärşämbe könne Jenevada jurnalistlarğa yasağan belderüendä bolay dide:
“Darfurdan häm Kordofannan, Xartum häm Omdurmanğa qadär, xätta annan da çittä Sudanıñ tınıç xalqı bu wäxşi häm mäğ’näsez köç qullanudan zıyan kürde”.
“Min Faşirda qılınğan wäxşileklär Kordofanda da qabatlanırğa mömkin dip bik borçılam. Bez bik citdi wäxşilek cinayät’läre, hiçşiksez, suğış cinayät’läre, ixtimal keşelekkä qarata cinayät’lär turında söyläşäbez”,- dide Volker Türk.
BMO Keşe xoquqları komissarı êtnik yaqtan da köç qullanu buluın assızıqladı.
Küpläp üterülär
Sudan armiyäse belän Operativ yärdäm köçläre arasında 3 Kordofan ştatında — Tön’yaq, Könbatış häm Kön’yaq Kordofanda atnalar däwamında bäreleşlär küzätelde häm distälägän meñ keşe töbäktän qaçtı.
Operativ yärdäm köçläre Sudannıñ 18 ştatı arasında, könbatış Darfurdağı 5 şatatnı kontrol’dä tota, läkin tön’yaq Darfurnıñ tön’yaq öleşläre armiya kontrolendä.
Armiya kön’yaqta, tön’yaqta, könçığışta häm üzäktä qalğan 13 ştatnıñ zur öleşen, şul isäptän başqala Xartumnı kontrol’dä tota.
Sudan armiyäse häm Operativ yärdäm köçläre arasında 2023 yılnıñ aprelendä başlanğan bäreleşlär meñlägän keşeneñ ülemenä kiterde.
Operativ yärdäm köçläre Faşirda küpläp üterülär, cäfalap intekterülär häm mäxkämäsez üterülär başqaruda ğayeplänä.
