Federal räsmilär Kanadanıñ buluı mömkin AQŞ yawına qarşı toru öçen xärbi plan äzerlänüen äytte.
Bu adım ilneñ könyağındağı kürşese belän räsmi bularaq tartqalaşunı modelläşüeneñ soñğı ber ğasırdan kübräk waqıt êçendäge berençe ürnägenä işaräli.
Qarşı toru planı AQŞ İlbaşı Donald Trampnıñ üz sośial plalforması aşa Kanada belän Grenlandiyäne qaplap alğan provokaśion amerikan bayrağı räsemen urtaqlaşqannan soñ äzerlände.
Räsmilär Kanadanıñ AQŞnıñ tulı masştablı höcümenä qarşı tora alaçaq xärbi köçkä iyä bulmawın, şuña kürä plannıñ keçkenä xärbi törkemnärdän häm watandaşlardan torğan törkemnärneñ ğadäti bulmağan qarşılıq kürsätüen küzdä totuın äytte.
Räsmilär plannı bäxäsläşergä wäqälätle bulmağannarı öçen isemnäreneñ açıqlanmawın belderde.
Sśenariy bu törkemnärneñ amerikan basıp aluçılarına qarşı tozaq qorunı, keşesez hawa apparatların qullanunı häm sabotaj yasawnı küzdä tota. Bu taktikalar distä yıllar êlek äfğan “Talibanı” tarafınnan urıslarğa, yaqınça 20 yıl êlek isä AQŞ köçläre belän berlektäşlärenä qarşı qullanılğan ide.
“Keşelär Kanadada nilär bulğanı belän çın küñeldän qızıqsına”
Räsmilär Kanadanıñ töp xärbi töbäklärendä ike könnän ber atnağa qädär waqıt êçendä AQŞ tarafınan bastırılacağın äytte.
AQŞ xärbi höcümeneñ ixtimalınıñ az buluı belderelsä dä, federal xökümät iñ naçar sśenariy bularaq basıp kerügä qarşı äzerlänä.
Kanadanıñ Ğomum ştab başlığı general Jennie Carignan 400 meñ keşelek üzixtıyarıy almaş (rezerv) köç buldırırğa teläwen äytkän ide.
Räsmilär yawlap alu oçrağında Franśiyä belän Böyekbritan kebek atom-töş qorallarına iyä illärneñ Kanadağa yärdäm itüen kötäçäklären äytte. Bu öç il dä, Amerika Quşma Ştatları ta NATO äğzase.
Äfğanstanda Kanada xärbi berleklären citäklägän layıqlı yaldağı general-mayor David Fraser: “Ägär sez Kanadağa höcüm itsägez, dönya sezneñ artınnan quaçağın beläsez, xätta Grenlandiyädän dä kübräk”, - dip äytte.
“Keşelär Kanadada närsä bulğanı belän qızıqsına, Venesuêla kebek tügel”, - dip östäp quydı general-mayor häm: “İlneñ möstäqillegen nığıtu öçen nigezdä Kanadada Germaniyä köymälären häm Böyekbritan oçqıçların kürä alasız”, - dip iskärtep uzdı.
