Ärdoğan: “Törkiyä Ğazzädäge xällär turında çınbarlıqnı söylärgä däwam itäçäk”
İlbaşı Räcäp Tayyip Ärdoğan Änkaranıñ Fälästin xalqı belän bergä nıq toruın häm ğadellek urnaşuındağı täwäkkällegennän hiç waz kiçmäyäçägen äytte
Törkiyä Cömhüriyäte İlbaşı Räcäp Tayyip Ärdoğan Ğazzädä yäşängännärneñ onıtılmawı häm ğadellek urnaşuı öçen här frontta köräşne däwam itäçäklären belderde.
Ärdoğan atnakiçen (pänceşämbe könne) başqala Änkarada oyıştırılğan mädäniyät häm sänğät büläklären tapşıru tantanasında yasağan çığışında: "Törkiyä Ğazzädä bulğan xällärneñ onıtılmawı häm ğadellekneñ urnaşuı öçen häryaqlap nıqlı köräşen däwam itäçäk”, - dip äytte.
İlbaşı Ärdoğan: "Xaqiqätne iğlan itüne üzeneñ şiğare itkän il häm citäkçelek bularaq bez dä nıq häm qaqşamas räweştä Fälästin xalqınıñ yanında torabız”, - dip äytte.
Batır media
Ärdoğan monnan tış Ğazzädäge waqiğalarnı yaqtırtuda kürsätkän qıyu poziśiyäläre öçen törek media organnarın maqtadı.
Däwlät başlığı: "Ğazzä genośidında “TRT” häm “Anadolu” agentlığıbız belän bergä törek matbuğat organnarı çınnan da batır totış kürsätte”, - dip äytte.
“Anadolu” agentlığınıñ Fälästinle fotoxäbärçese Ali Cädallahnı da maqtawçı Ärdoğan: "Anıñ obyektivınnan çağılğannar barı tik Ğazzädäge ütereşneñ qurqınıç yağın ğına tügel, Fälästin xalqınıñ ğadel, däräcäle häm abruylı qarşılıq kürsätüen dä böten böyeklege belän keşelekneñ kön tärtibenä çığardı”, - dide.
Ärdoğan: “Ğazzädä ike yıl buyu däwam itkän växşi genośidnı fotosürätlär aşa böten dönyağa faş itkän, obyektivı belän çınbarlıqnı “śivilizaśiyäle” dip äytelgän dönyağa citkergän Ali qärdäşebez ber ük waqıtta “Anadolu” agentlığıbıznıñ fotoxäbärçese bularaq cirlektä wazıyfa başqara”, - dip bilgeläp uzdı.