Rusiyä Baltıyq däwlätlärenä kisätü yasadı
Mariya Zaxarova: "Ukraina dronnarına hawa kiñlekläre açılsa, cawap qaytarılaçaq"
Rusiyä tışqı êşlär ministrlığı süzçese Mariya Zaxarova Latviya, Litva häm Êstoniyaneñ hawa kiñleklären Ukraina dronnarına açu qararları turındağı kisätülärne iğtibarğa almasalar, Mäskäw citäkçelegeneñ bu xälgä cawap qaytaraçağın äytte.
Rusiyä däwlät xäbär agentlığı “TASS” xäbärenä kürä Zaxarova düşämbe könge açıqlawında Baltıyq illärenä tiyeşle kisätüneñ yasaluın belderde. Zaxarova: "Ägär bu illärneñ rejimnarı citärlek däräcädä aqıllı bulsalar, qolaq salırlar. Yuq ikän, cawap qaytaraçaqbız",— dide.
Mart ayı başlarında Latviya saqlanu ministrlığı, Rusiyäneñ Baltıyq däwlätläreneñ üz cirlären Ukrainanıñ Rusiyägä qarşı höcümnäre öçen qullanırğa röxsät birüe däğwası belän Latviya, Litva häm Êstoniyägä qarşı kiñ qolaçlı häm koordinaśiälängän mäğlümat operaśiäse alıp baruın açıqladı.
Ministrlık Latviä belän bergä Litva häm Êstoniäneñ dä Ukrainanıñ Rusiyägä qarşı höcümnären pilanlaştıruda yäki tormışqa aşıruında qatnaşmawın citkerde.
Ministrlık fikerençä Rusiyäneñ Baltıyq däwlätlärenä qarşı mäğlümat operaśiäläreneñ maqsatı — NATOnıñ abruyın töşerü, cämğiätne bülü, däwlät oyışmalarına bulğan ışanıçnı kimetü häm Ukrainağa kürsätelüçe yärdämne qaqşatu.