Ärdoğan Päzäşkiyan belän telefonnan söyläşte

Törkiyä ilbaşı Räcäp Täyyip Ärdoğan İran däwlät başlığı Mäsud Päzäşkiyan belän telefonnan söyläşte häm AQŞ belän İran arasındağı ike аtnalıq waqıtlıça utnı tuqtatu, töbäk iminlege turında fiker alıştı.

Törkiyä ilbaşı idaräseneñ êlemtä bülege pänceşämbe könne beldergänçä, Ärdoğan Törkiyäneñ häm başqa bäyläneşle illärneñ utnı tuqtatu prośessında zur tırışlıq quyuın äytte.

Ul kiläse könnärdä Paqıstanda başlanuı kötelgän AQŞ-İran söyläşülärennän daimi tınıçlıq häm totrıqlılıqnı täêmin itü öçen maksimal’ däräcädä faydalanu kiräklegen assızıqladı.

Ärdoğan tınıçlıq prośessın sabotajlarğa teläwçelärgä mömkinlek birmäwneñ ähämiyätenä iğ’tibar yünältte häm Änkaranıñ yaña êtapta här törle yärdäm kürsätergä äzer buluın belderde.

Ärdoğan çärşämbe könne AQŞ ilbaşı Donal'd Tramp belän ütkärgän söyläşüendä dä oxşaş belderülär yasadı; bu waqıtnı näticäle faydalanırğa kiräklegen assızıqladı häm prośessnı köçsezländerä torğan ğamällärdän saqlanu turında kisätte.

Çärşämbe könne Paqıstan baş ministrı Şahbaz Şärif Törkiyä, Qıtay, Soğud Ğaräbstanı häm başqa berlektäşlärgä AQŞ belän İran arasında utnı tuqtatuğa ireşü öçen kürsätelgän bäyäläp betergesez yärdämnäre öçen räxmät belderde.

Ärdoğan Törkiyäneñ dus illär häm partnyerlar belän bergä yaña êtapta här’yaqlap öleş kertergä äzer buluın äytte.

Törkiyä ilbaşı şulay uq İran xalqınıñ yuğaltuları uñayınnan qayğı urtaqlaştı.

Ärdoğan AQŞ-İran tınıçlıq söyläşülären tizlätü maqsatında soñğı ike köndä berniçä telefon söyläşüe ütkärde.

İran häm AQŞ sişämbe könne suğışnı tuqtatu öçen soñğı kileşügä yul açunı maqsat itep quyğan ike atnalıq utnı tuqtatu iğ’lan itte; bu suğış 28 fevraldän birle yözlägän keşeneñ ülüenä häm yaralanuına kiterde.

 Räsmi söyläşülärneñ berençe turı şimbä könne İslamabadta ütkäreler dip kötelä.