İzrailneñ Ğazzägä yul totqan Global’ Sumud flotına höcümennän soñ qanunsız räweştä qulğa alınğan törek aktivistları sişämbe könne irekkä cibärelde häm İzrail yawı astındağı Yordannıñ könbatış üzänlege belän Yordaniya arasında urnaşqan Patşa Xösäyen (Allenby) küpere çik qapqasına kilep citte.

İzraildäge Ketziot törmäsendä totılğan aktivistlar İzrail kontrolendä törmädän küçerü maşinaları belän çikkä kiterelde.

Aktivistlarnıñ azat itelüe Änkaranıñ flot basqınında qulğa alınğan Törkiyä watandaşlarınıñ imin räweştä ilgä qaytuın täêmin itü öçen könnär buyı diplomatik tırışlıqlar alıp baruı näticäsendä buldı.

Xalıqara sularda höcüm

İzrail diñgez köçläre uzğan çärşämbe könne xalıqara sulardağı flotqa höcüm itep 50dän artıq ildän 470tän artıq aktivistnı qulğa alğan ide.

Distälägän köymädän torğan konvoy İzrailneñ Ğazzägä yaqınça 18 yıl däwam itkän blokadasın özärgä tırışıp gumanitar yärdäm alıp bara ide.

İzrail blokadası Ğazzädäge 2,4 million keşene bik awır şartlarda yäşärgä mäcbür itä.

2023 yılnıñ oktyabrennän birle İzrail höcümnäre näticäsendä kübese xatın-qızlar häm balalar bulğan 67 meñnän artıq fälästinle üterelde, Gazzäneñ asqorması yuqqa çığarıldı, töbäk yäşi almaslıq xälgä kilde.