13 yäşlek malay ğailäsen qotqaru öçen berniçä säğat buyı yözä
Ostin Appelbi diñgezgä ağıp kitkän gailäsenä yärdäm çaqıru maqsatınnan yarğa baru öçen yaqınça dürt säğat buyı yözgän.
Avstraliya yarlarında diñgezgä ağıp kitkän gailäsen qotqaru öçen berniçä säğat buyı yözgän 13 yaşlek malay änise häm ênese belän señleseneñ ğomeren qotqardı.
Şähär üzäge Perttan yal itärgä kilgän gailä töşke säğatlärdä qunaqxanälärennän arendalanğan kanoe häm köräk sörfı taqtaları belän diñgezgä çığa, ämma okeandağı su ağımı häm cil alarnı açıq diñgezgä taba ağızıp kitä.
Politsiya belderüençä, Ostin Appelbi änise Djoanna (47 yäş), ênese Bo (12yäş) häm señlese Greysnı (8yäş) qatlawlı xäldän qotqaru häm yärdäm çaqıru öçen yarğa qadär 4 kilometr buyı yözgän.
Ostin başta su ala başlağan rezin köymä belän yärdäm êzlärgä çığuın äytä. Soñraq köymäne taşlap qaldıra häm yözüen äkrenäytkäne öçen qotqaru jiletın da salıp ata.
Ul yaqınça dürt säğat buyı dulqınlı diñgezdä yarğa taba yözgändä yaxşı närsälär turında uylarğa tırışuın häm cirle waqıt belän säğat 18:00dä yärdäm çaqıruın söyläde.
'Dulqınnar bik zur häm östemdä qotqaru jiletı yuq ide... Tuqtawsız üz-üzemä êçtän "yözüeñne däwam it, yözüeñne däwam it" didem. Axır çiktä yarğa kilep cittem häm qomğa ayaq basqaç, xälsezlektän yığıldım', — dip iskä ala Ostin.
Politsiya êzläw-qotqaru boralağınıñ änise häm ike balanı säğat 20:30da qotqaru jiletları kigän häm sörf taqtasına totınğan xäldä tabuın belderde. Alar yardan 14 kilometr yıraqlıqta bula, suda 10 säğatkä yaqın waqıt ütkärgännär.
Politsiya inspektorı Djeyms Bredli : '13 yäşlek balanıñ bu ğamälen niçek kenä maqtasaq ta az. Ul ixtiyarı häm qıyulığı arqasında änise häm bertuğannarın qotqardı', — dide.
Djoanna Appelbi sişämbe köne jurnalistlarğa yasağan belderüendä öç balasın yalğız qaldıra almawı öçen iñ ölkän ulı Ostinnı yärdäm çaqırırğa cibärüen äytte.
Avstraliya Tapşıru Korporatsiyäsenä (ABC) birgän interv’yusında: 'Ğomeremdä birergä mäcbür bulğan iñ awır qararlarnıñ berse Ostinğa "Yarğa barıp citergä tırış häm yärdäm çaqır. Bu xäl bik tiz citdiläşergä mömkin" diyü ide', — dide.
Djoanna ulınıñ yarğa barıp citäçägenä ışanuın, ämma qoyaş bayıp yärdäm kilmägäç, şöbhälänä başlawın söyläde.
'Küñel kütärenkelegen saqlap, cır cırladıq, şayarttıq häm... qoyaş bayıy başlağanğa qadär monı uyın kebek kürergä tırıştıq, ä menä ul çaqta diñgez bik qatı dulqınlana başladı. Bik zur dulqınnar kütärelde', — dip söyli äni keşe.
Gailäneñ dürt äğzası da meditsina tikşerenüen uzdı, ämma berseneñ dä xastaxanädä däwalanuğa ixtıyacı bulmawı açıqlandı.