Pol’şa timer yuldağı şartlawdan soñ ildäge soñğı Rusiya konsullığın da yaba

Pol’şa Mäskäw öçen êşläwçe keşelär oyıştırğan dip sanağan timer yul şartlawınnan soñ ildäge soñğı Rusiya konsullığın da yabaçağın iğ’lan itte.

Bu qarar Kreml’ tarafınnan tänqıyt’kä duçar buldı.

Tışqı êşlär ministrı Sikorskiy, çärşämbe könne yasağan belderüendä, Rusiya küzläw oyışması isemennän êş itkän dip sanalğan ike Ukraina watandaşı Pol’şada timer yulnı şartlatuda ğäyeplängäç älege qararnıñ qabul itelüen citkerde.

Şartlaw ike il arasında bolay da kiyerenke bulğan mönäsäbätlärne tağın da kiskenläşterde.

Däwlät agentlığı PAP yazğança, Sikorskiy Mäskäwne küp tapqırlar “doşmannarça êşçänlek” däwam itsä, diplomatik köçeneñ kimeteläçäge turında kisätülären belderde.  

Konsullıq yabılğaç, Rusiyäneñ Pol’şada barı tik Varşavadağı tulı wäqalätle ilçelege genä qalaçaq.  

Kreml’ qararnı ğayepläp, bu ike il arasındağı mönäsäbätlärneñ tulısınça cimerelüen kürsätä dip belderde.

Kreml’ süzçese Dmitriy Peskov, Mäskäwneñ bu qarardan käyefe kitüen äytte häm Pol’şanı “Rusofobiya” kürsätüdä ğäyepläde.

Peskov bolay dide:
“Pol’şa belän mönäsäbätlär bötenläy naçarlandı. Bu qarar, möğayen, şunıñ çağılışı - Pol’şa xakimiyäteneñ konsullıq yäki diplomatik mönäsäbätlärne beterü teläge”.
Pol’şa belän Rusiya arasındagı mönäsäbätlär Ukraina suğışı başlanğannan birle kisken naçarlandı, Varşava Awrupada Kiyevnıñ iñ köçle yaqlawçılarınnan bersenä äwerelde, ä Mäskäwne Pol’şa iminlegen totrıqsızlandırırğa tırışuda ğäyepli.