Vyetnamda su basu “can aldı”
İldä distälägän cir şuışuı barlıqqa kilde
İlneñ tirä-yaq moxitnı saqlaw ministrlığına kürä bıyıl barlıqqa kilgän tabiğıy afätlär Vyetnamda 400dän artıq keşeneñ ğomeren özde yäisä yuğaluına kiterde. 3,6 milliard dollardan artıq zıyan salındı.
Räsmi zatlar ağımdağı yılnı il tarixındağı ğadättän tış tabiğıy afätlär yılı dip atadı. Däwlät mediasında comğa könne urın alğan xäbärlärgä kürä Vyetnamda köçle yawım-töşem säbäpçe bulğan su basuda kimendä ike keşe ülde, unnan artıq cir şuışuı çıqtı.
Vyetnam üzägeneñ könyağında atnalar buyı yawğan yañğırlar näticäsendä populyar yar buyı turizm üzäklärendä 100 meñlägän öyne su bastı, tawlı urınnarda ülemgä kitergän cir şuışular kürelde.
“Voice of Vietnam” xäbär agentlığı beldergänçä pänceşämbe könne Lam Dong provinśiyasendä meñlägän öy su astında qaldı.
Bu provinśiyadä 16 cir şuışuı küzätelgän, yullar häm küperlär zıyan kürgän, yözlägän öy êvakuaśiyalängän.
Tirä-yaq moxitnı saqlaw ministrlığınıñ Meteorologiya häm gidrologiya departamentı başlığı urınbasarıda comğa könne belderü yasap: “2025 yıl tarixtağı iñ ğadättän tış tabiğıy afätlär yılı buldı,” – dide.
Tirä-yaq moxitnı saqlaw ministrlığına kürä bıyıl Vyetnamda 15 tayfun häm 6 tropik depressiya belän ber rättän barlığı 21 ğarasat çıqtı. Bu – 1961 yılda terkäw başlanğannan birle iñ yuğarı san.
Vyetnam dönyanıñ iñ aktiv tropikal śiklon töbäklärennän bersendä urnaşqan.
Tirä-yaq moxitnı saqlaw ministrlığı: “Äle ber yılda da 20 yılğada beryulı ğadättän tış su basular kürelmägän ide,” – dide.