"Awrupanıñ yaqınça 6 atnalıq oçqıç yağulığı qaldı"

Xalıqara ênergiya agentlığı başlığı Awrupanıñ yaqınça 6 atnalıq oçqıç yağulığı qaluın äytep, İran suğışı säbäple neft belän täêmin itülärdä qıyınlıq däwam itsä, oçışlarnıñ ozaqlamıy tuqtatılu mömkinlege turında kisätte.

Agentlık ğomum mödire Fatix Birol pänceşämbe könne Ormuz buğazınnan uzuçı neft, gaz häm başqa möhim täêmin itü liniyaläreneñ özelüennän kilep çıqqan häm “bez oçrağan iñ zur ênergiya krizisı” dip atagan wäzğiätneñ dönyaküläm yoğıntıları turında ayanıç kartina yasadı.

“Êlegräk “Dire Straits” (Awır waqıtlar) isemle ber törkem bar ide häm Awrupa xäzer çınnan da awır xäldä; monıñ global’ iqtisadqa citdi yoğıntıları bulaçaq. Bu xäl ni qadär ozaq däwam itsä, dönyada iqtisadi üseş häm inflyaśiya şul qadär naçar bulaçaq,” - dide ul.

Yoğıntılarnıñ tağın da yuğarı benzin bäyäläre, tağın da yuğarı tabiğıy gaz bäyäläre häm yuğarı êlektr bäyäläre räweşendä bulaçağın beldergän Birol qayber töbäklärneñ başqalarına qarağanda kübräq zıyanda bulaçağın äytte.

Birol: “Başta Yaqın Könçığıştan ênergiya aluçı Aziya illäre bar,” - dip söyläde häm Yaponiya, Koreya, Hindstan, Qıtay, Paqıstan belän Bangladeşnı ürnäk itep kürsätte.

Parijdağı ofisında belderü yasağan Birol: “Annarı Awrupa häm Amerika,” - dip östäde.

Xalıqara ênergiya agentlığı ğomum mödire: “Ormuz buğazı yañadan açılmasa, Awrupa öçen ozaqlamıy A şähärennän B şähärenä qayber oçışlarnıñ yağulıq citmäw säbäple tuqtatıla aluı turındağı xäbärlärne işeterbez dip äytä alam,” - dide.