BMOnıñ Fälästin qaçaqlarına yärdäm agentlığı höcümnärgä borçıla
Agentlık Yordannıñ könbatış üzänlegendä cimerü häm yortsız qaldırunıñ däwam itüen citkerä
BMOnıñ Fälästin qaçaqlarına yardäm kürsätü agentlığınıñ Yordannıñ könbatış üzänlege êşläre mödire Roland Fridrix X platformasında bolay dip yazdı: “Ğazzä häm Yordannıñ könbatış üzänlegeneñ kiläçäge ber. Ğazzädäge çigenü başqa cirlärdä yawlawnı arttıru öçen forsat bulmasqa tiyeş.”
Ğazzädä 10 oktäbrdä AQŞ ilbaşı Donald Tramp täqdim itkän êtaplı plan nigezendä ut tuqtatu kileşüe ğamälgä kerde.
Fridrix Yordannıñ könbatış üzänlegendä yähüd bistälärendä yäşäwçelärneñ köç qullanuı häm kilep urnaşuçılar sanınıñ artuı turında borçu belderep: “Yaqlawsız fälästinlelärne üz cirlärennän qualar häm cirlären yawlap alalar” - dide.
Fälästin sannarına kürä, qanunsız kilep urnaşqan yähüdlär 2023 yılnıñ oktäbrennän birle Yordannıñ könbatış üzänlegendä 7154 höcüm oyıştırğan, bu höcümnärdä 33 fälästinle ülde häm 33 cämğıyäten küçenergä mäcbür buldı.
Cänin, Tulkarem häm Nur Şäms şähärlärendäge qaçaqlar lagerläre dä bu säyäsät nigezendä buşatılğan häm lagerlarga kire qaytu qatğıy tıyılğan.
Fridrix agentlıknıñ yaw astındağı Fälästin cirläre öçen tınıçlıq häm totrıqlılıq nigeze bula alırlıq tulı näticägä ireşü maqsatı belän barlıq taraflar belän xezmättäşlek itärgä äzer buluın qabatladı.
2023 yılnıñ oktäbrennän birle İzrailneñ genoŝid suğışında Ğazzädä 68 meñ 200 dän artıq keşe ülde, 170 meñ 300 dän artıq keşe yaralandı dip xäbär itä Ğazzäneñ sälämätlek saqlaw ministrlığı.
Şul uq waqıtta Yordannıñ könbatış üzänlegendä dä höcümnär artqan. Räsmi Fälästin sannarına kürä kim digändä 1056 fälästinle üterelgän, yaqınça 10 meñ 300 keşe yaralanğan häm 20 meñnän artıq keşe, şul isäptän 1600 bala totqarlanğan.