Rusiya İrannıñ İsfaxan şähärendäge konsullığınıñ höcümnärdä zıyan kürüen belderde

Rusiya tışqı êşlär ministrlığı süzçese Mariya Zaxarova İrannıñ İsfaxan şähärendäge Rusiya konsullığınıñ bu atna başında başqarılğan bombalı höcümnärdä zıyan kürüen äytte.

Zaxarova Rusiya diplomatik wäkilçelegenä höcümneñ xalıqara kileşülärne açıqtan -açıq bozu buluın belderde häm barlıq yaqlarnıñ diplomatik binalarnıñ qağılğısızlığına xörmät kürsätergä tiyeşlegen assızıqladı.

Zaxarova ministrlıqnıñ internet säxifäsendäge belderüendä bolay dide:
“8 martta İrannıñ İsfaxan şähärendä şul uq isemdäge provinśiya idaräse ofisına höcümdä  Rusiya konsullığı zıyan kürde.”

Süzçe bolay dip östäde:
“Ofis binasındağı häm toraq yortlardağı täräzälär watıldı, şartlaw berniçä xezmätkärne alıp ırğıttı. Bäxetkä, ülüçelär yäki citdi yaralanular bulmadı.”

Bu waqıyğa AQŞ häm İzrailneñ İranğa qarşı başlağan suğışınnan soñ kiyerenkeleklär artqan çorda buldı.

Kreml’dän yasalğan belderügä qarağanda, Rusiya däwlät başlığı Vladimir Putin sişämbe könne İran däwlät başlığı Mäsud Päzäşkiyan belän dä däwam itkän bäreleşlär turında fiker alıştı.

Putin höcümnärne tiz arada tuqtatırğa çaqırdı.