“Xamas” belän İzrail totıq häm totqın isemlekläre belän almaşqan

AQŞ, Qatar häm Törkiyä aradaşçı bularaq Şarm-äş-Şäyxtä oçraştı.

“Xamas” çärşämbe könne belderü yasap, äsirlär belän almaşu kileşüe qısalarında irekkä cibäreläçäk İzraille totıqlar häm fälästinle totqınnar urın alğan isemleklär belän almaşuların häm AQŞ ilbaşı Donald Trampnıñ Ğazzädäge utnı tuqtatu planı belän bäyle bularaq Misırdağı söyläşülärgä uñay qarawın belderde.

Fälästinle qarşılıq kürsätü törkeme äytüençä söyläşülärdä bäreleşne tuqtatu mexanizmnarı, İzrail köçläreneñ Ğazzädän çigenüe häm äsirlär belän almaşu kileşüe quzğatıla.

Söyläşülärne küzätep baruçı fälästinle ber çığanaq “Reuters”ka yasağan belderüendä Trampnıñ 20 maddälek planınıñ berençe êtabın çınğa aşıru öçen datanıñ älegä bilgelänmäwen citkerde.

Tramp 7 oktäbrdä kileşü mäs’äläsendä optimist buluın açıqladı.

Maxsus wäkil Stiv Uitkoff häm Tramp berençe tapqır ilbaşı bulğan çorda Yaqın Könçığış ilçese bularaq wazıyfa başqarğan kiyäwe Djared Kuşner da urın alğan AQŞ delegaŝiyase bu plan belän bäyle söyläşülärdä qatnaşaçaq.

İsemleklär belän almaşu suğışnı beterü öçen ike yaq arasında yasalğan berençe möhim adımğa işaräli.

İzraille ber räsmi zatqa kürä Netanyaxunıñ yaqın serdäşe bulğan İzrailneñ strategik êşlär ministrı Ron Dermer çärşämbe töştän soñ söyläşülärgä quşılaçaq.

“Reuters” xäbärenä kürä möhim aradaşçı bulğan Qatar premyer-ministrı Şäyex Möxämmäd bint Abdurrahman äl-Tani häm Törkiyäneñ küzläw oyışması başlığı İbrahim Qalın da çärşämbe könne utnı tuqtatu söyläşülärendä qatnaşaçaq.

“Xamas” kiçekmästän qabat tözekländerü barışınıñ başlanuın teli.

İzrail isä “Xamas”nıñ qoralsızlanuın teli läkin oyışma monıñ bäysez Fälästin däwläte qorılmıyça mömkin bulmawın äytä.

AQŞlı räsmi zatlar söyläşülärdä başta bäreleşlärne tuqtatu, Ğazzädäge izraille totıqlar belän İzraildäge Fälästinle totqınnarnıñ niçek itep irekkä çığarılaçağı mäs’äläläreneñ qaraluın teläwen äytä.

İzrail höcümnärenä qarşı bar dönyada yarsu arttı. Höcümnär arqasında Ğazzä xalqı yortsız qaldı häm töbäktä açlıq krizisı başlandı.

İzrail armiyase 2023 yılnıñ oktäbrennän birle kübese xatın-qız häm balalar bulğan 67 meñnän artıq fälästinlene üterde.

Töbäk bertuqtawsız bombağa totular arqasında yäşi almaslıq xälgä kilde.