Ğazzädä yaña tuğan sabıy tuñıp ülgän
Ğazzä räsmi zatları beldergänçä, ike atnalıq Möxämmäd Xälil Äbu äl-Xair gipotermiyädän ğomeren yuğaltqan.
Ğazzädäge sälamätlek saqlaw wäqalätleläre suğış barğan töbäktä naçar hawa şartlarında köçle salqınnar säbäple yaña tuğan ber sabıynıñ hälaq buluın xäbär itte.
Sälamätlek saqlaw ministrlığı sişämbe könne yasağan belderüendä Möxämmäd Xälil Abu äl-Xair isemle ike atnalıq bäbineñ düşämbe könne gipotermiya näticäsendä ğomeren yuğaltuın ctkerde.
Ministrlıq mäğ’lümatına qarağanda, Abu äl-Xair yäkşämbe könennän birle reanimaśiyädä yatqan.
Uzğan atnada Ğazzädä küzätelgän Bayron dawılı kim digändä 14 keşeneñ ğomeren özde, 53 meñnän artıq çatırnı öleşçä yäki tulısınça su bastı; qayber çatırlarnı taşqınnar ağızıp alıp kitte yäki köçle cil cimerde. Şulay uq Ğazzädä 13 bina cimerelde.
İzrail 10 oktyabr’dä ğamälgä kergän utnı tuqtatu kileşüe qısalarındağı cawaplılıqların ütämi, çatırlar häm küçmä yortlar kebek sıyınu urınnarınıñ kerüen totqarlawnı däwam itä.
İzrai, 2023 yılnıñ oktyabrennän birle Ğazzädä alıp barğan genośid xarakterındağı suğışında, küpçelege xatın-qızlar häm balalar bulğan yaqınça 70 700 keşene üterde, 171 meñnän artığın yaraladı, töbäkne xäräbälärgä äyländerde.