"AQŞ İran suğışı arqasında Ukraina öçen waqıt taba almıy"

Ukraina ilbaşı Volodimir Zelenskiy AQŞnıñ tınıçlıq söyläşüläre wäkilläreneñ İrandağı suğış säbäple Ukrainağa waqıt taba almawları turında äytep, AQŞ qoralların cibärüdäge totqarlıqlarğa zarlandı.

Zelenskiy Germaniyäneñ “ZDF” däwlät teleradiokompaniyäsenä birgän intervyusında Rusiyäneñ Ukrainağa qarşı suğışın tuqtatu öçen Mäskäw citäkçelege belän aradaşçılıq itüçe Stiv Uitkoff häm Djared Kuşnernıñ xäzergе waqıtta daimi räweştä İran belän söyläşülär ütkärüen belderde.

Bu ike isemne pragmatik dip atağan Zelenskiy Uitkoff häm Kuşnernıñ suğışnı tuqtatu öçen Rusiyä ilbaşı Vladimir Putinnıñ iğtibarın kübräk cälep itärgä tırışuın äytte läkin ägär dä AQŞ Putingä basım yasamasa, häm ruslar belän yomşaq dialoğ qorsa, ul çaqta alarnıñ qurıqmayaçaqların citkerde.

AQŞ citäkçelegendä ütkärelüçe häm İkençe bötendönya suğışınnan birle Awrupanıñ iñ ülemle bäreleşe bulğan Ukraina suğışın tuqtatunı maqsat itep quyğan söyläşülär 28nçe fevraldä İran suğışı başlanğannan soñ, mart ayı axırınnan birle tuqtap qaldı. Rusiyä häm Ukraina söyläşüçeläre fevraldän birle Jenevada oçraşmadı.

Zelenskiy AQŞ qoralların Ukrainağa cibärü mäsäläseneñ zur problemaga äylänüen belderde.

Ukraina liderı: "İran belän suğış däwam itsä, bu - Ukraina öçen äzräk qoral digän süz. Şulay uq hawa höcümennän saqlanu çaraları yağınnan kritik wäzğıyät," — dide.

Zelenskiy sişämbe könne irtän Ukraina suğışı mäsäläse buyınça Kanśler Fridrix Merś häm möhim ministrlar belän oçraşu öçen Berlinğa barğan xökümät delegaśiyäsenä citäkçelek itte.

İke il şulay uq saqlanu östenlekle strategik partnerlık tözeläçägen dä citkerde.

Zelenskiy soñraq Norvegiya vizitı waqıtında ütkärelgän matbuğat konferenśiyäsendä monıñ ayıruça “PAC-3” kirtä quyuçı raketalar häm “PAC-2” raketaları öçen problema buluın äytte.

Zelenskiy bolarnıñ berençe çiratta uzğan yılnı başlanğan häm Ukrainanıñ Awrupa illäre tarafınnan finanslanuçı AQŞ cihazların aluına mömkinlek birüçe Ukrainanıñ östenlekle ixtıyacları isemlege “PURL” programması arqılı satıp alınuın belderde.

Ukraina däwlät başlığı: "Yaqın Könçığıştağı suğışnıñ iñ başınnan uq qıyınlıqlar belän oçraşuıbız mömkin ikänen añladıq," — dide.

Zelenskiy qorallarnıñ äkren kilüen belderep, monıñ üzläre öçen bik awır xäl buluın añlattı.

Zelenskiy, Norvegiya premyer-ministrı Yonas Gar Styore belän ütkärgän söyläşülärennän soñ qamilläşterelgän saqlanu häm iminlek xezmättäşlegenä qağılışlı urtaq belderge imzalawların açıqladı.