Törkiyä häm Nigeriyä säwdä, investiśiyälär, saqlanu bäyläneşlären kiñäytü öçen adımnar yasıy

Törkiyä häm Nigeriyä sişämbe könne sänäğät, säwdä, investiśiyälär häm saqlanu ölkälärendä xezmättäşlekne tiränäytü maqsatında, ike däwlät arasındağı iqtisadi êlemtälärne sizelerlek kiñäytüne küzdä totqan yaña mexanizmnarnıñ ğämälgä keräçägen iğlan ittelär.

Törkiyä säwdä ministrı Ömär Bolat Nigeriyä ilbaşı Bola Äxmät Tinubunıñ Törkiyäğä räsmi säfäre qısalarında ütkärelgän söyläşülärdän soñ Änkara belän Abujdanıñ Urtaq iqtisadi häm säwdä komitetı tözü turında urtaq beldergegä häm Xäläl sıyfat infrastrukturası turındağı kileşü memorandumına qul quyuların belderde.  

Bolat üz belderüendä:
“Oçraşuda sänäğät, säwdä, investiśiyälär häm citeşterü ölkälärendä xezmättäşlegebezne tiränäytäçäk mäs’älälärne centekläp qaradıq”, — dip äytte häm bu kileşülärneñ ike ildä dä biznes  öçen yaña mömkinleklär tudıraçağın iskärtte.

9 kileşü imzalandı

Bolat yaqlarnıñ ike yaqlı säwdä külämen 5 milliard dollarğa citkerü maqsatına ireşü öçen êşläwen, säwdäne törleländerü, investiśiyälärne arttıru häm şäxsi tarmaq partnyorlıqların nığıtırğa omtıluların belderde.

Ul şulay uq Törkiyä­neñ Nigeriyä belän mönäsäbätlären ışanıç häm ozın möddätle strategik partnyerlıq qaraşına nigezlänep däwam itäçägen assızıqladı.

Änkarada ütkärelgän üzara häm delegaśiyälär däräcäsendäge söyläşülärdän soñ Törkiyä ilbaşı Räcäp Täyyip Ärdoğan häm Nigeriya ilbaşı Bola Äxmät Tinubu qatnaşında barlığı 9 kileşü imzalandı.

Bu kileşülär xärbi äzerlek, saqlanu häm iminlek, diaspora säyäsäte, media häm kommunikaśiya, yuğarı belem birü, xäläl akkreditaśiyäse, diplomatik äzerlek, sośial’ häm xatın-qızlar êşläre ölkälären üz êçenä ala.

Tinubu totrıqsızlıqqa qarşı köräş häm iqtisadi üseşne alğa êtärü yünäleşendäge urtaq tırışlıqlarğa basım yasap, Nigeriyäneñ  bigräk tä iminlek häm säwdä ölkälärendä Törkiyä belän xezmättäşlekne tiränäytergä teläwen belderde.

Mönäsäbätlär üsä bara

İke däwlät arasındağı säwdä küläme 2025 yılnıñ berençe 11 ayında 688,4 million dollarğa citte.

Nigeriya, ênergetika säwdäsen dä kertep, uzğan yıl Tropik Afrikada Törkiyä­neñ iñ zur säwdä partnyerı buldı.

Yaqlar arasında saqlanu bäyläneşläre tiz üste: Nigeriyä hawa köçläre Törkiyä citeştergän pilotsız oçu apparatları häm 6 “ATAK T129” höcüm boralağı satıp aldı.

Törkiyä şirkätläre Nigeriyäneñ tözeleş, ênergetika, tekstil häm citeşterü tarmaqlarında aktiv êş alıp bara, 50dän artıq törek firması ilgä yaqınça 400 million dollar külämendä investiśiyä kertte.

Törkiyä podryadçiklarınıñ Nigeriyädä başqarğan proyektlarınıñ ğomumi bäyäse 3 milliard dollarğa yaqın.

1960 yılda diplomatik mönäsäbätlär urnaştırğan Törkiyä häm Nigeriyä Abudja suğışçan törkemnärgä qarşı köräşne köçäytkändä, bigräk tä iminlek häm saqlanu sänäğäte ölkälärendä xezmättäşlekne totrıqlı räweştä kiñäytte.