İndoneziyadağı Semeru yanartawı öç säğat êçendä cide märtäbä attı
Wäqalätlelär Besuk Kobokan yılgasına 500 metr yaqınlığında bernindi êşçänlek alıp barılmawı turında kisätü yasadı.
Däwlät mediası beldergänçä, İndoneziyanıñ Könçığış Yava töbägendäge Semeru yanartawı çärşämbe könne irtän öç säğat êçendä cide märtäbä şartladı häm vulkanik kölne tübäsennän 800 metr biyeklekkä qadär attı.
“Antara” xäbär agentlığına kürä, berençe şartlaw irtän säğat 4 tulıp 58 minutta bula häm tönyak-könçığışqa taba kitüçe qalın sorı köl bolıtı barlıqqa kiterä. Seysmik aktivlıq maksimum 22 mm amplitudada terkälä häm 138 saniye däwam itä.
Annarı säğat 6 tulıp10 minutta häm 6 tulıp 56 minutta şartlawlar küzätelä, köllär 300dän 700 metr biyeklekkä qadär citä. Säğat 7 tulıp 5 minutta bulğan tağın ber şartlaw isä 600 metr biyeklegendäge köl bolıtın tönyaqqa taba cibärä.
Bişençe şartlaw 800 metrğa qadär kütärelä. Wäqalätlelär yanartaw xäräkätlären küzätüen däwam itkän waqıtta, tağın ike şartlaw turında xäbär itelde.
Belgeçlär cirle xalıqnı qaynar bolıtlarnıñ häm lava ağımınıñ yanartaw tübäsennän 17 kilometrğa qadär citä aluı turında kisätte häm Besuk Kobokan yılgasına 500 metr yaqınlığındağı êşçänleklärdän tıyılıp torırğa çaqırdı.
Tın okean "ut qırşawı" dip ataluçı töbäktä urnaşqan İndoneziya yış qına seysmik aktivlıq kiçerä häm monda 120dän artıq aktiv yanartaw bar.