“Nvidia” citäkçese Qıtaynıñ yasalma aqıl yarışında ciñäçägen küzallıy
“Nvidia” şirkäteseneñ ğomum mödire Jensen Xuang Könbatış illäre, şul isäptän, AQŞ häm Böyekbritaniyäneñ yasalma aqıl mäsäläsenä “şiklänep” qarawları arqasında artqa qaluın söyläde.
“Nvidia” başlığı Jensen Xuang Qıtaynıñ kilse buın yasalma aqıl yarışında ciñäçäge turında kisätte häm Vaşingtonnı bu yünäleştäge tırışlıqların tizlätergä çaqırdı.
AQŞnıñ çip gigantı citäkçese “Financial Times” gazetına intervyusında Pekinnıñ ênergiyä subsidiyäläreneñ yasalma aqıl texnologiyäsenä köç birüçe aldınğı yarımütkärgeçlär citeşterü tırışlıqların arttıruın belderde.
Britaniya gazetı anıñ çärşämbe könne Londondağı çarada: “Qıtay yasalma aqıl yarışında ciñäçäk,” dip äytüen citkerde.
‘Yasalma aqılğa şiklänep qaraw’
Bu atnada Aq Yort “Nvidia”nıñ “Blackwell” çip modelen Qıtayda satuına röxsät birergä telämäwen belderde.
AQŞ monıñ säbäbe itep Qıtayğa xärbi östenlek birü riskın kürsätte.
Xuang Vaşingtonnı “Nvidia”nıñ çip êksportına çikläwlärne yomşartırğa çaqırıp, bu säyäsät Qıtaynıñ üz texnologiyäsen üsterügä genä yärdäm itäçäk dip belderde.
Êşmäkär çärşämbe könne “Financial Times” gazetına intervyusında AQŞ ştatlarınıñ yasalma aqılğa qarata kertelgän yaña qağıydälärne tänqıytläp, Qıtayda texnologiyägä köç birü öçen däwlätneñ êlektr ênergiyäsen subsidiyäläwenä işarä itte.
Ul AQŞ häm Britaniya kebek könbatış illäreneñ yasalma aqılğa “şiklänep” qarawları arqasında artqa qaluların äytte.