Xarkovta küpfatirli yortqa Rusiyä höcüme näticäsendä keşelär häläk buldı
Polşa, höcümgä cawap itep, xärbi oçqıçlarnıñ kütärelüen belderde
Ukraina wäqalätleläre Rusiyä höcümnäreneñ şimbä irtärendä il buyınça, kimendä, altı keşeneñ ülemenä kiterüen belderde.
Xarkov töbägendä küpfatirli yortqa yasalğan höcüm xaräbälärendä biş keşeneñ gäwdäse tabılğan, Dnipro töbägendä isä ber keşe häläk bula.
Xarkov şähäre başlığı Igor Terexov, êlegräk yasağan belderüendä qotqaru törkemnäreneñ Xarkovnıñ Kiyevski rayonındağı toraq yort xaräbälärendä öç keşeneñ gäwdäsen tabuın äytkän ide.
Töbäk xärbi wäkile Oleg Sinegubov “Telegram”dağı yazmasında höcümdä ike balanıñ (6 häm 11 yäş), 17 yäşlek qıznı kertep, un keşeneñ yaralanuın citkerde. Sinegubov, biş qatlı yortnıñ höcümnärdä “ğamäldä yuqqa çıquın” belderep, qotqaru törkemnäreneñ, ber balanı da kertep, xaräbälär astında qaluı qurqınıçı bulğan tağın 10 keşene êzläwen äytte.
NATO äğzası Polşa, kürşe Ukraina cirlärenä qarata arttırılğan höcümnärgä cawap bularaq xärbi oçqıçların hawağa kütärüen belderde. Polşa Qorallı köçläreneñ operatsiyä komandalığı, Rusiyäneñ Ukraina cirlärenä raketalar belän höcüm itüe arqasında, il hawa kiñlegendä xärbi oçqıçlarnıñ wazıyfa ütäwen iğlan itte.
Ukraina buyınça hawa höcüme xäwef signalı birelde.
Xarkov töbägendäge Çuguyev şähärendä mêr Galina Minaeva ber yortqa êläkkän dron höcümendä ike keşeneñ yaralanuın äytte.