Seul armiyäse: “Tön’yaq Koreya üzençälekläre bilgesez ballistik raketa cibärde”
Yaponiya Pxen’yannıñ soñğı raketası ilneñ maxsus iq’tisadıy töbägennän çittä töşkän bulırğa mömkin dip belderde.
Kön’yaq Koreya armiyäse Tön’yaq Koreyanıñ könçığış su kiñleklärenä taba kim digändä ber ballistik raketa oçırtuın xäbär itte.
Kön’yaq Koreya ğomum ştab räislege comğa könne yasağan belderüendä waqıyğa belän bäyle centekle mäğ’lümat urtaqlaşmadı.
Oçırtılğan raketanıñ töre häm niçä çaqrım oçqanı älegä bilgesez.
Şul uq waqıtta Yaponiya prem’yer – ministrı Sanaê Takaiti Tön’yaq Koreyanıñ soñğı raketasınıñ Yaponiyäneñ maxsus iq’tisadıy töbäge çitendä töşüe farazlana dip belderde.
Takaiti räsmi zatlarnıñ raketa cibärü belän bäyle zarar turında xisap beldermäwen dä äytte.
“Yonhap” xäbär agentlığı citkergänçä, soñğı kiyerenkeleklär Kön’yaq Koreya küzläw xezmäte çärşämbe könne yasağan belderüdä Tön’yaq Koreyanıñ cidençe atom-töş sınawına äzer buluı häm Kim Çen In qarar qabul itsä, monı tiz arada tormışqa aşıra aluın alğa sörgännän soñ buldı.
Parlamentnıñ küzläw komitetınıñ yabıq utırışında saqlanu küzläw agentlığı wäqalätleläre xalıq ışanıçlılarına brifing birep, üz bäyälämälären urtaqlaştılar.
Xakimiyättäge Demokratik partiya xalıq ışanıçlısı Park Sun-von belän oppoziśiyädäge Xalıqnıñ köçe partiyäse deputatı Li Song-gwön utırıştan soñ jurnalistlarğa:
“Ägär Kim Punggye-ridäge 3-nçe tunnel’nı qullanıp atom -töş sınawı ütkärü turında qarar qabul itsä, ul bik tiz arada başqarıla ala”,- dip belderdelär.
Tön’yaq Koreyanıñ bu adımı uzğan ayda berniçä qısqa radiuslı raketa oçırtqannan soñ yasaldı.